Koronavırýsqa baılanysty álem elderiniń statısıkasyn jarıalap otyratyn Worldometers.info saıtynyń 18 shildedegi dereginshe, dúnıejúzinde 14,1 mıllıonnan astam adamǵa COVID-19 juqty. Vırýstan ólgender sany 600 myńǵa jýyqtady. 

İndetten eń qatty zardap shegip jatqan el – AQSH. Elde vırýs juqtyrǵandar sany 3,7 mıllıonnan asyp ketti. Ólgender sany 142 myńnyń ústinde. Dúnıejúzi boıynsha koronavırýs juqtyrǵandardyń tórtten biri osy elde. AQSH halqynyń sany 331 mıllıonnyń ústinde ekenin eskersek, el azamattarynyń 1 paıyzdan astamyna koronavırýs juqqan deýge bolady. 

Álem elderiniń arasynda juqtyrǵandar sany boıynsha da, ólim boıynsha da ekinshi orynda turǵan – Brazıalıa. Sońǵy málimetke saı, elde 2 mıllıonnan astam adamnan COVID-19 anyqtaldy. Brazılıa – vırýs juqtyrǵan azamattarynyń sany eki mıllıonnan asqan ekinshi el. AQSH sıaqty bul elde de halqynyń 1 paıyzy indetke shaldyqqan. 

Halqynyń sany 1,3 mıllıardtan asatyn Úndistanda vırýs juqtyrǵandar sany 1 mıllıonnan asty. Biraq bul eldegi statısıkaǵa kóptegen halyqaralyq uıymdar kúmánmen qaraıdy. Olardyń oıynsha, Úndistanda koronavırýsqa shaldyqqandar sany resmı statıskadaǵydan áldeqaıda kóp bolýy múmkin. 

Koronavırýs Afrıka materıgindegi eń úlken memleketterdiń biri – Ońtústik Afrıka Respýblıkasynda (OAR) da órship tur. Bul el vırýs juqtyrǵandar sany boıynsha dúnıejúzinde 6-orynda tur. Elde COVID-19 tabylǵan adamdardyń sany 337 myńnyń ústinde. 

OAR-dan keıingi orynda turǵan Meksıkada da vırýs juqtyrǵandar sany 331 myńnan asty. Sońǵy táýlikte elde 7257 adamnan koronavırýs tabylǵan. Dúnıejúzilik densaýlyq saqtaý uıymynyń dereginshe, Meksıka koronavırýs tez taralyp jatqan elderdiń qatarynda. Sońǵy resmı aqparatqa saı, elde koronavırýstan ólgender sany 38 310-ǵa jetti. Bul – álem boıynsha tórtinshi kórsetkish. 

DDSU-nyń dereginshe, koronavırýs jyldam qarqynda tarap jatqan memleketterdiń biri – Qazaqstan. Sońǵy resmı aqparatqa saı, elde koronavırýsqa shaldyqqandar sany  68 myńnan asty. Al ólgender sany – 375 adam. Qazaqstan qazir vırýs juqtyrǵandar sany jóninen álem elderiniń arasynda 29-orynda tur. Biraq eldegi sarapshylar resmı statısıkaǵa kúmánmen qaraıdy. Óıtkeni elde koronavırýsqa shaldyqqan adamdardyń birazyna pnevmonıa dıagnozy qoıylǵan. Keshe el bıligi tamyz aıynan bastap koronavırýs jáne pnevmonıamen aýyrǵandar bir statısıkaǵa biriktiriletin habarlady.