Shymkent qalasy Asar móltek aýdanyna qarasty ınfeksıalyq aýrýhanada qaıtys bolǵan naýqastyń tanysy Dáýren Bolys vıdeo túsirip, meıirgerlerdiń dári suraǵanyn aıtty. Onyń sózinshe, aýrýhananyń bas dárigeri dári jetkilikti ekenin málim etken. Beınejazbany Facebook paraqshasynda jarıalady.

"Qaıyrly kesh qurmetti aǵaıyndar, týystar, baýyrlar. Men qazir Shymkenttegi Asar móltek aýdanyndaǵy ınfeksıalyq aýrýhana aldynda turmyn. Aǵam ómirden ozdy. Alla rahymyna alsyn! Jıyrma kúndeı osy aýrýhanada jatty, sońǵy on kúnde jansaqtaý bólimine túsip qalǵan edi. Búgin qaıtys boldy. Bir ókinishtisi jalǵyz uly osynsha ýaqyt shyryldap osy aýrýhanaǵa dári tasydy. Men búgin osy aýrýhananyń bas dárigeri Ǵanı degen jigitpen sóılestim. Aǵam aýyryp jatyr, biraz kúnnen beri balasy qymbat dáriler tasyp jatyr dedim. Ol kisi "eshqandaı dári qajet joq qoı, nege tasıdy" dedi. Osynda jatqan aǵamnyń baılanys telefonynan medbıkeler balasyna, qyzyna, áıeline habarlasyp otyrǵan. Túnde bolsyn, kúndiz bolsyn. Dári kerek, jetkizińizder dep otyrǵan. Bas dáriger "kim ol habarlasqan, eshqandaı dáriniń qajeti joq" deıdi. Sonda bul túsiniksiz jaǵdaı bolyp tur. Bul dári saýdasy ma ne boldy sonda? Jalǵyz uly biraz kúnnen beri dári tasydy. Bas dáriger ózimizde dári bar deıdi, biraq medbıkeler qansha kúnnen beri suratyp otyrǵan. Ol dáriler naýqasqa salyndy ma, joq pa Qudaı biledi. Sybaılas jemqorlyq qarsy is-qımyl agenttigi taǵy da basqa tekserý mekemeleri osyny nazarlaryńyzǵa alyńyzdar. Bundaı bassyzdyqty toqtatý kerek. Bas dáriger qyzmetkerlerińiz qalaı jumys isteıdi ózi?" delingen vıdeoda. 

Araǵa bir saǵattaı ýaqyt salyp Dáýren Bolys taǵy da óz paraqshasynda tikeleı efır túsirdi.

"Meniń aıtaıyn degenim. Myna balasyn qansha ýaqyt boıy sandaltyp, dári izdetken dárigerler, medbıkeler qalaı bolsa da tabylý kerek. Men qazir bas dáriger Ǵanı degen azamatpen jolyqtym. Ol maǵan ýáde berdi "arnaıy beınebaqylaýdan qarap izdeımiz" dep. Bul jerde biraq kúmán bar, olar beınebaqylaýdaǵy jazbalardy óshirip tastaýy múmkin. Ózderiniń qaýipsizdikterin oılap. Taǵy bir másele aǵamnyń medısınalyq kitapshasy, sonyń barlyǵy ózgeriske ushyraýy múmkin. Olar bir-eki kúnde barlyǵyn durystap jiberýi múmkin. Aǵamnyń telefonymen habarlasyp dári suratqan adamdardyń aty-jónin surasa tutqany qoıa salǵan eken. Esimderin anyqtaý sol másele bolyp tur bizge. Bul qaraýsyz qalmaý kerek. Densalyq saqtaý mınıstri Soı myrza bul máseleni baqylaýǵa alyńyz. Basqa da tıisti mekemeler baqylaýyna alsyn" dedi naýqastyń tanysy tikeleı efırde. 

Meıirgerlerdi aıyptap beınejazba túsirgen Dáýren Bolys óziniń paraqshasyndaǵa vıdeolardy óshirip tastady.