"Bir kúnde 26 myń teńge taptym". Kóshede kólik faralaryn súrtetin jetkinshekterdiń áńgimesi

/image/2020/07/21/crop-147_104_323x575_112108699500.jpg

Almaty qalasynda baǵdarshamnyń qyzyl túsine toqtaǵan kólikterdiń farasyn súrtip, nápaqa tabatyn jasóspirimder bar. Osy ispen aınalysatyn úsh balany áńgimege tartýǵa tyrysqanymyzda basynda sóılesýge nıet bildirmedi. Jumystary týraly baıandap berse, árqaısysyna 500 teńge bergimiz keletinin aıtqanda ǵana kelisip, ózderine 500 emes, 400 teńge de jetetinin jetkizip, "kásipteri" týraly kósile sóıleı bastady.

13 jastaǵy Maksım, Ian, Ismad esimdi úsh bala qaladaǵy Abaı dańǵylynyń Rozybakıev pen Gagarın kóshelerimen qıylysatyn jerinde kólik farasyn súrtip aqsha taýyp júrgenine birneshe aı boldy. Olar bul jumysty ózderi sekildi balalardyń ınternettegi vıdeosyn kórgennen keıin isteı bastaǵan.

– Men Youtube jelisinen reseılik bloger túsirgen "Kólik súrtetin balalar aıyna qansha tabady" degen vıdeorolık kórdim. Bul osydan eki aı ýaqyt buryn mamyr aıynda, biz oqýdy támamdaǵan kezde bolǵan edi. Vıdeony kórgen soń osy ispen aınalysyp kórýge bel baıladym. Seriktes bolýǵa dostarymdy tarttym. Qajetti zattardy alyp, jumys isteýge shyqtyq. Birinshi kúni 2000 teńge taýyp, qýanyshymyz qoınymyzǵa syımady. Keıin taǵy bir ret kóreıik dedik, osylaı turaqty túrde aınalysyp kettik. Basynda shyqqan kezde kólikter arasynda júrý qaýipti kóringen. Qazir barlyq erejelerdi saqtap, baǵdarshamnyń qyzyl túsi janǵan soń jumysqa kirisemiz. Bir farany bes sekýndtyń ishinde súrtemiz, – dedi 13 jastaǵy Maksım.

Olardyń aıtýynsha, ata-analary bul kásippen aınalysqandaryna qarsy bolmaǵan.

– Kúnine qansha teńge tapsaq ta, aqshamyzdyń jartysyn ata-anamyzǵa beremiz. Otbasymyzda eshqandaı qıyndyq joq. Biraq biz olarmen bóliskimiz keledi. Keıde úıge azyq-túlik alyp baramyz. Qalǵanyn ózimizge alyp qalamyz. Úıde baýyrlarymyz bar, olarǵa da tátti ala baramyz, – deıdi Ian.

Jetinshi jáne segizinshi synyp oqýshylary ózderi tapqan aqshany velosıped, jańa smartfon, samokat alý úshin jınap jatqandaryn aıtty.

– Ian velosıpedke jınap jatyr, Ismed osy kúnge deıin jınaǵan aqshasyna Samsung A10S smartfonyn satyp aldy. Al men ózimniń trúk jasaıtyn samokatyma qosalqy bólshekter alyp jatyrmyn. Meniń bar qyzyǵýshylyǵym sol, – deıdi balalardyń arasyndaǵy pysyqtaý kelgen Maksım.

Basynda qansha aqsha tabatynyn aıtqysy kelmegen balalar áńgime barysynda tabystarynyń jaqsy ekenin jasyrmady.

– Osy aıdyń basynan beri shamamen 100 myń teńgedeı taptyq. Bul endi jolymyzdyń bolǵanyna baılanysty. Keıde bir kóliktiń ózi 5 myń teńge berip ketedi, keıde faralaryn súrtkizip bolǵan soń aqshasyn bermeı ketetinder de bar. Mysaly, búgin bir kisi farasyn súrtip berýin surady, men súrtip berdim. Al ol meniń betime qarap turyp terezesin jaýyp aldy. Sondaı sátterde kóńilimiz túsip ketedi. Arasynda 5 teńge berip ketetin adamdar da bar. Kóp aqsha bergen saıyn jumys istegimiz keledi. Juma jáne seısenbi kúni tirlik jaqsy júredi. Nege ekeni belgisiz biraq osy kúnderi biz aqshany kóbirek tabamyz, – dedi Ismed.

Balalardyń sózinshe, bir kúnde Ismed eń kóbi 10 myń teńge, Ian 15 myń teńge, Maksım 26 myń teńge paıdaǵa kenelgen. Bir kúndik eń tómengi tabystary – 5 myń teńge. "Demalys kúnderi aqsha az tabamyz. Onyń barlyǵy adamdardyń kóńil-kúıine baılanysty" deıdi ózderi.

– Bir kóliktiń ózi keıde óte kóp aqsha usynady. Mysaly keshe Ismadqa bir adam 5 myń teńge berdi, al Ian 1000 teńge aldy. Men bolsam, búgin bir áıel kisiden 10 myń teńge aldym. Qymbat kólik mingen kisiler sarańdaý keledi. Qarapaıym kólik ıeleri qolymyzdy qaıtarǵan emes. Keıbir taýar tasymaldaıtyn júrgizýshilerdiń balmuzdaq, sýshı, pıssa bergen sátteri de boldy, – deıdi Maksım.

Kishkentaı kásipkerler túski asty ýaqyt joǵaltpaý úshin jaqyn jerdegi kafelerden ishedi nemese fastfýd satatyn dúńgirshekterden doner, býrger alyp jeıdi.

Tańnan keshke deıin kóshede júretin balalar kelesi jyly da jumys istegisi keledi. Qazirgi tańda búkil Almaty boıynsha olarǵa baqtalas bolyp júrgen 20 shaqty bala bar eken. Biraq bir kásippen aınalysyp júrgendikten qarym-qatynastary jaqsy.

– Biz sıaqty jumys istep júrgen 20-25 bala bar shyǵar. Olarmen dos bolyp aralasamyz. Keıbireýlerin jaqtyra bermeıtinimiz de ras. Eger bizdiń jumys istep júrgen aýmaqqa keletin bolsa, biz olardy basqa jaqqa jiberemiz, biraq osy kúnge deıin tóbelesip kórmeppiz. Urys boldy, al tóbeles joq, – deıdi jetkinshekter.

Kámelet jasqa tolmaǵandary úshin kóp jaǵdaıda polısıa qyzmetkerleri jumys isteýge ruqsat bermeı, qaıtaryp jiberedi. Al keıbir polıseıler boqtap, aıqaılap ózderimen birge alyp ketedi eken.

– Polısıa qyzmetkerleri bizdi qýyp jiberedi ıa bolmasa ózderimen birge alyp ketedi. Ol endi qandaı qyzmetker jolyqqanyna baılanysty. Keıbireýleri baıqamaı qalady, al baıqap qoısa, alyp ketýi múmkin. Búgin mysaly polıseıler otyrǵan kólikke jaqyndap faralaryn súrtip bersem bolady ma dedim. Olar jumys kóligimen bolǵan joq. Biraq meniń ótinishimdi qabyldap, men kóliginiń farasyn tazalap berdim. Eńbegim úshin 200 teńge berdi. Artyq eshteńe aıtpady, – deıdi Ismet.

"Kóshede qaıyr tilep júrgennen góri jumys istegen jaqsy" dep sanaıtyn balalar jaǵdaıy joq adamdardy kórgende qoldan kelgenshe kómektesip turady eken. 13 jasynan bastap kásippen aınalysyp júrgen oqýshylardyń bolashaqqa qurǵan josparlary da bar. Er jetken soń Maksım – aspaz, Ismed – avtomehanık, al Ian óziniń klınıkasyn ashyp, tis dárigeri bolǵysy keledi.

"Bir kúnde 26 myń teńge taptym". Kóshede kólik faralaryn súrtetin jetkinshekterdiń áńgimesi

Qatysty tegter :

Pikir qaldyrý

Qatysty Maqalalar