Balqash qalasynda polısıa qyzmetkeri jasóspirim qyzdy zorlady degen kúdikke ilindi. Bul týraly "Ne molchı KZ" uıymy habarlady. 

"Oqıǵa 5 shilde kúni Balqash qalasynda bolǵan. Bastapqyda polısıa qyzmetkeri 14 jastaǵy jasóspirim qyzdy unatyp qalyp, óziniń aram oıyn iske asyrmaq bolǵan. Ol qyzdyń anasyna "saıajaılaryńa ury tústi, ol senderdiń aýlalaryńa esirtki ósirdi" dep aldap, qyzynyń nómirin surap alǵan. Keıin quqyq qorǵaý organynyń qyzmetkeri qyzǵa habarlasyp, "sen esirtki qabyldadyń" dep bopsalaǵan. Polıseı  jasóspirim qyzǵa "ákeńdi 10 jylǵa túrmege qamaıdy" dep qoqan-loqqy kórsetip, óziniń degenine kóndirmek bolady.

Polıseı 5 shilde kúni WhatsApp messendjeri arqyly habarlasyp, qajetti qujattarǵa qol qoıý keregin aıtyp, kezdesýge shaqyrady. Jasóspirim qyz qoryqqanynan ózi turatyn úıiniń mekenjaıyn aıtqan. Polıseı úıine kelip, jasóspirimge esirtki qabyldaǵany týraly moıyndaý hat jazǵyzyp alady. Sodan soń ony jynystyq qatynasqa ıtermelep, bolǵan jáıt týraly  ata-anasyna aıtpaýǵa ýáde bergizedi" delingen "Ne molchı KZ" uıymynyń Facebook-taǵy jazbasynda. 

Uıym ókilderiniń aıtýynsha, barlyq jazba men qońyraýlar saqtalǵan.

"Jasóspirim qyz bir apta boıy úndemeıdi. Sodan 12 shildede úlken ápkesine kórshi polıseıdiń bopsalap, zorlaǵanyn aıtyp beredi. Keıinnen anasy Balqash qalasynyń polısıasyna aryz jazǵan. Alaıda polısıa isti qozǵaýdan bas tartyp otyr. Olar óz qyzmetkerine qatysty is qozǵaı almaıtynyn aıtyp, qujattardy Qaraǵandy oblystyq polısıa departamentine joldady.

Jábirlenýshige eshqandaı da saraptamalyq analız syndy tekserister júrgizilmegen. Biraq polıseı bolǵan oqıǵadan keıin 13 shildede jumystan qýylǵan. Keıin polıseı qyzdyń anasynan aryzdy qaıtaryp alýdy suraǵan.  Ol qyzǵa ótken jyly 14 jasynda  (qazir qyz 15 jasta) ǵashyq bolyp qalǵanyn jáne otbasynda jalǵyz asyraýshy ekenin aıtqan.

"NeMolchıKZ" qorynyń ókilderi qyzdyń anasynan ótinish aldy jáne endi biz Qaraǵandy oblysy polısıa departamentiniń bastyǵynan osy qylmystyq isti óz baqylaýyna alýyn jáne óziniń qyzmettik laýazymyn paıdalanyp, aýyr qylmys jasaǵan kúdikti pedofıldi jaýapqa tartýdy talap etýińizdi suraımyz" delingen uıymnyń jelidegi jazbasynda.