Almaty qalasyna koronavırýspen kúreske kómek kórsetý úshin Reseıden bir top maman keldi. Bul týraly qala ákimi Baqytjan Saǵyntaev İnstagram-daǵy paraqshasynda jazdy.

«Baýyrlas qalalardyń yntymaqtastyǵy týraly kelisimshart sheńberinde Máskeýden Almatyǵa COVID-19 kúreske kómek kórsetý úshin bir top maman keldi. Onyń quramynda densaýlyq saqtaý salasynyń uıymdastyrýshylary, ınfeksıonıster, epıdemıologtar, anestezıologtar, revmatologtar men pýlmonologtar bar»,– dep jazdy Baqytjan Saǵyntaev.

Mamandardyń bir toby ınfeksıalyq stasıonarlardyń jumysyn, aýyr naýqastardyń emdelý hattamalaryn jáne pasıentterdi ornalastyrý jumystaryn baǵalaıdy.

Qalǵan top qoǵamdyq densaýlyq basqarmasynyń uıymdastyrý máselelerin, barlyq deńgeıdegi KVI-den emdelýshilerge medısınalyq qyzmettiń kórsetilý deńgeıine mán bermek.

«Al zerthanalyq zertteýler júrgizý, jańa stasıonarlardy uıymdastyrý jáne ottegi gazdarymen emdeý máseleleri jeke pysyqtalady. Sondaı-aq Mossanepıdqadaǵalaýdyń epıdemıologtary almatylyq áriptesterimen pikir almasyp, keńes beredi»,– dep atap ótti ákim.