Almatyda medıkamentter men jeke qorǵanys quraldaryn (JQQ) óndirý boıynsha farmasevtıkalyq klaster qurylady. Bul týraly qala ákimdiginiń baspasóz qyzmeti habarlady.

​Buǵan deıin habarlanǵandaı, halyqty dárilik preparattarmen ýaqtyly qamtamasyz etý maqsatynda Almaty qalasynyń ákimdigi birqatar qosymsha sharalardy qabyldady. Bul týraly onlaın-brıfıng barysynda Almaty qalasy ákiminiń orynbasary Saparbek Tuıaqbaev aıtty.

​Qalada dárihanalar men aýrýhanalardy dárilerdiń qajetti qorymen qamtamasyz etý úshin keshendi jumystar júrgizilýde. Osyǵan baılanysty Almatyda búdjeti 5 mlrd tg bolatyn qalalyq turaqtandyrý qory quryldy. Qordyń basty qyzmeti preparattardy jetkizý toqtap qalǵan jaǵdaıda shuǵyl túrde áreket etýge arnalǵan qajetti rezerv qurý bolyp tabylady.

Qosymsha, Alataý «Inovasıalyq tehnologıalar parki» arnaıy ekonomıkalyq aımaǵynyń aýmaǵynda farmasevtıkalyq óndiris rettelýde.

«Qalada medıkamentter men jeke qorǵanys quraldaryn otandyq óndirýshilerdiń óndirýi baǵytynda da júıeli jumystar júrgizilýde. Atap aıtqanda, jyl sońyna deıin, farmasevtıkalyq klasterdi qurý josparlanýda. Osynyń bári ımportqa táýeldi bolmaý úshin jasalýda», — dedi Saparbek Tuıaqbaev.