Almaty mańyndaǵy aýdandarǵa COVID-19 anyqtaýǵa arnalǵan 2 zerthana ashylady. Bul týraly búgin onlaın brıfıń barysynda qalanyń bas sanıtarlyq dárigeri Jandarbek Bekshın aıtty.

Onyń aıtýynsha, qalada zerthanalyq joldarmen rastalǵan 8259 adamnyń 71,2 paıyzy ǵana Almatyda tirkelgen. Qalǵan 1404 adam qala mańyndaǵy aýdandarda nemese basqa óńirlerden kelgen.

Jaqynda dárigerler, epıdemıologtar, zerthana mamandarynan turatyn arnaıy top Almaty aglomerasıasyndaǵy 3 aýdandy aralap kórdi. Qalalyq mamandar oblys mamandaryna keshendi keńes kórsetti.

«Aralaý kezinde alys aýdandarda COVID-19 anyqtaýǵa arnalǵan zamanaýı zerthana tapshy ekenin baıqadyq. Sondyqtan, Almatydan oblysqa 1 stasıonarlyq, 1 jyljymaly zerthana berý týraly sheshim qabyldandy. Baıqaǵanymyzdaı, Almatyǵa túsken qońyraýlardyń 40 paıyzy Almaty oblysynan kelgeni anyqtaldy. Sondyqtan, eger olarǵa jergilikti jerde kásibı kómek kórsetilse, olarǵa Almatyǵa kelýge qajettilik bolmas edi», - dedi Jandarbek Bekshın.

Stasıonarlyq zerthana qýaty táýligine 1000 test bolsa, jyljymaly zerthanalar táýligine 500 test bolmaq.

«Bul aýdanda turyp jatqan halyqqa úlken kómek bolady. Shyǵaryp jatqan zerthanalardyń synama tarıfteri óte tómen. 11500 tg aspaıdy. Laboratorıalyq zertteýdiń qol jetimdi bolýy mańyzdy dep oılaımyn», - dedi J.Bekshın.