Naýqastardy eshelondaý tekserýge ketetin ýaqytty qysqartýǵa jáne juqtyrý qaýpin tómendetýge múmkindik beredi. Bul týraly Almaty jedel járdem stansıasynyń bas dárigeri habarlady.

Almaty qalalyq jedel medısınalyq kómek kórsetý stansıasynyń bas dárigeri Birjan Ospanov óńirlik komýnıkasıalar qyzmetine bergen suhbatynda júrgizilip jatqan jumystar, sonyń ishinde koronavırýs máseleleri týraly aıtty.

Atap aıtqanda, Birjan Ospanov jedel járdem shaqyrýlaryn eshelondaý jáne baǵdarlaý máselelerin túsindirdi.

«Jedel járdem shaqyrýlary boıynsha barýdy eshelondaý jáne baǵdarlaý bizdiń qyzmetti jaqsartyp, oǵan uıymdasqan túrde kelýge múmkindik berdi. Jumys istegen sońǵy aptalarda biz alǵa biraz ilgeriledik. Ótinishterdiń azaıyp kele jatqany baıqalady, jedel járdem jumysyn durys uıymdastyrý esebinen durys baǵdarlaý men dıslokasıalaý kómegimen bizdiń qol jetkizgen nátıjemiz jaman emes», — dep habarlady B. Ospanov.

Qazirgi ýaqytta Almatydaǵy klınıkalar aımaqtyq jáne aýmaqtyq qaǵıdalar boıynsha birneshe eshelondarǵa bólingen. Birinshi eshelonda quramynda júz jáne odan asatyn reanımasıalyq oryndary bar iri klınıkalar bar. Onda aýrýhanaǵa jatqyzý kórsetkishteri bar, aýyr jáne ortasha aýyrlyq jaǵdaıyndaǵy naýqastar jetkiziledi. Ekinshi eshelonǵa jatatyn oryndar qory men jan saqtaý qýaty azdaý stasıonarlar jatqyzylady.

«Osylaı bólý jedel járdem stansıasynyń jumysyn tıimdi etip retteýge múmkindik beredi. Shaqyrtý túsken jerge jetý ýaqyty 15,4 mınýtty quraıdy», — dep túsindirdi jedel járdem stansıasynyń bas dárigeri, soǵan qaramastan shaqyrtýlar boıynsha qajetti ýaqyt kóbirek ketedi, sebebi árbir shaqyrtý túsken saıyn jeke qorǵanys quraldaryn, obaǵa qarsy kostúmderdi kıýdiń ózi qosymsha ýaqytty alady.

Jańadan engizilgen ózgeristerge sáıkes, naýqastar aǵynyn koronavırýs ınfeksıasyna kúdikti jáne ony juqtyrǵandar dep mindetti bólý qarastyrylǵan. Stasıonarlardy baǵdarlaý jáne eshelondaý naýqastar aǵynyn bólýge baǵyttalǵan.

«Naýqasqa dıagnoz qoıýda jedel járdem qyzmetine PTR tekserý úshin KT-sy bar stasıonarlar men klınıkalarǵa barý qajet. Baǵdarlaýdyń ózi osyǵan baǵyttalǵan. Bizdiń tarapymyzdan kompterlik tomografıa jasaıtyn 30 ortalyq anyqtaldy, olar stasıonarly jáne emhanalyq dep bólinetin bolady. Biz naýqastardy aýrýhanaǵa jatqyzýǵa apara jatqanda bizben belgilengen stasıonarda jáne bizben belgilengen emhanada ornalasqan KT arqyly ótemiz. Sol jerde KT jasalyp, ókpeniń qanshalyqty zaqymdanǵany anyqtalǵannan keıin, pasıentterdi stasıonarǵa joldaımyz», — dep atap ótti B.Ospanov.

Mamannyń aıtýynsha, osy proses barysynda tekserýge ketetin ýaqyt azaıady, bir jaǵynan pasıentter aǵyny bólingennen keıin, ol óz kezeginde juqtyrý qaýpin azaıtady.