Búgin Almaty áýejaıyna dári-dármekteri bar kezekti bort kelip qondy. Bul týraly qala ákimdiginiń baspasóz qyzmeti habarlady.

«İńkár» farkompanıasynyń tapsyrysy boıynsha Úndistannan jalpy salmaǵy 32 tonna bolatyn júk jetkizildi. Kompanıa ókilderiniń aıtýynsha, áýejaıda jalpy sany 242 myń qaptama bolatyn COVID-19-ǵa qarsy preparat túsirilgen.

Júk kedendik rásimdeýden ótip, qajetti qujattar toltyrylǵannan keıin kompanıanyń qoımasynan dárihana jelilerine jetkiziledi.

Kompanıa sonymen birge arnaıy turaqtandyrý qoryna dári-dármekterdi satyp alý tetigin iske asyra bastaǵanyn aıtty.

Eske sala ketsek, Almaty qalasynyń ákimi B. Saǵyntaevtyń tapsyrmasymen farmasevtıkalyq kompanıalarǵa qajetti dári-dármekterdi satyp alý úshin paıyzsyz nesıe berýge 5 mlrd tg kóleminde qarjy bólingen. Qarajattar qaıtarymdy jáne aınalmaly negizde «jumys isteıdi».

Shilde aıynyń basynda keıbir dárihanalarda suranys joǵary bolǵandyqtan, ystyq túsiretin jáne basqa preparattardyń tapshylyǵy týyndaǵany belgili. Alaıda jedel qabyldanǵan sharalardyń arqasynda jaǵdaı turaqtandy. Sonymen qatar, qaladaǵy turaqtandyrý qorynan dári-dármekterdi Almatydaǵy COVID-19-ǵa qarsy stasıonarlarǵa jetkizý jumystary bastaldy.

Buryn habarlanǵandaı, shilde aıynyń sońyna deıin Almatyǵa COVID-19-ǵa qarsy preparattardyń 6,5 mln qaptamasy jetkiziledi.