Almatyda karantın kezeńinde toı ótkizgeni úshin mekeme jumysy bir jarym aıǵa toqtatyldy. Bul týraly óńirlik komýnıkasıalar qyzmetinde ótken onlaın-brıfıng barysynda Almaty qalasy Túrksib aýdany ákiminiń orynbasary Ermek Beıseýov aıtty.

Aýdanda koronavırýstyq ınfeksıanyń aldyn alý jáne boldyrmaý maqsatynda qatań shekteý sharalary qolǵa alynǵan. Shekteý sharalaryn, betperde rejımin jáne áleýmettik qashyqtyq saqtaý boıynsha keń aýqymdy túsindirý jumystary júrgizilýde. Túsindirý jumystaryna aqparattyq taqtaıshalardy ornalastyrý, aýdan ákimdigi ókilderiniń, aýdandyq SES, aýdandyq polısıa basqarmasy qyzmetkerleriniń jáne volonterlar shtabynyń qatysýymen monıtorıńtik-túsindirý toptarynyń qyzmet etýi kiredi.

Tek 5 shildeden bastap 646 obekt tekserildi, onyń ishinde 131 nysannan sanıtarlyq normalardyń buzylýy jáne jumys rejımin shekteý sharalary anyqtaldy. Nysandarǵa qatysty ákimshilik hattamalar toltyryldy.
«Nysandardy baqylaý boıynsha sharalar kún saıyn júrgiziledi. Qazirgi ýaqytta 131 nysan tártip buzýshylyqtar tolyq joıylǵansha óz qyzmetterin toqtatty. Monıtorıń toptar teksergennen keıin ǵana bul nysandar jumystaryn qalpyna keltire alady », — dedi E. Beıseýov.

Sonymen birge,monıtorıńtik toptyń Túrksib aýdanyndaǵy sotqa bergen ótinishi boıynsha Dostluk meıramhanasynyń qyzmeti toqtatyldy, onda karantın rejımi kezinde 100 adamǵa arnalǵan banket ótkizildi.

Almaty qalasynyń mamandandyrylǵan aýdanaralyq ákimshilik sotynyń qaýlysyna sáıkes jeke kásipkerge 277 800 tg kóleminde memleket kirisine aıyppul salyndy jáne qyzmeti 1,5 aıǵa (45 kúnge) toqtatyldy.

Sondaı-aq, aýdanda 11 jaıaý polısıa toptary uıymdastyrylyp, ýchaskelik kólikter patrúldeýge jáne aýlalar men halyq kóp jınalatyn jerlerde túsindirý jumystaryn júrgizýge paıdalanyldy. Búgingi tańda jeke tulǵalarǵa betperde rejımin saqtamaǵany úshin 25 ákimshilik hattama toltyryldy. Buǵan qosymsha, aýdandyq prokýratýramen birge dárihanalardaǵy dári-dárimekterdiń baǵasyn baqylaý úshin 2 top jumys jasaýda.