Almaty qalasynyń ákimi B. Saǵyntaevtyń tapsyrmasymen KVI juqtyrǵan naýqastar emdeletin stasıonarlardy dári-dármekpen úzdiksiz qamtamasyz etetin rezervtik qor quryldy. Onyń jumysyna 5 mlrd. teńge kóleminde qarajat qarastyrylǵan.

13 shildeden bastap rezervtik qordan ınfeksıalyq jáne provızorlyq aýrýhanalarǵa 70 myńnan astam qajetti dári-dármek qaptamasy jetkizildi. Onyń ishinde deksametazon, seftrıakson, azıtromısın, enoksaparın, oflofloksasın, meropenem, kleksan jáne parasetamol bar.

«Búginde aýrýhanada KVI juqtyrǵan naýqastardy, sonymen qatar qosalqy aýrýlardy emdeýge qajet dári-dármekterdiń aılyq qory bar. Búgingi tańda aýrýhanada dári-dármektiń jetispeýshiligi joq», — dedi qalalyq I. Jekenova atyndaǵy qalalyq klınıkalyq juqpaly aýrýlar aýrýhanasynyń sarapshy-dárigeri Tamara Ýtaǵanova.

Qordaǵy dári-dármekter Ftızıopýlmonologıa ortalyǵyna da jetkizildi. İndet bastalǵan ýaqyttan beri bul aýrýhana karantındik jáne provızorlyq bólim retinde jumys istep keledi. Alaıda qazir munda tek koronavırýs juqtyrǵan naýqastar emdeledi.

«Em qabyldap jatqan naýqastardyń zardap shekpeýi úshin biz únemi, kúndiz-túni, ózimizge qajet dári-dármekterdiń ótinimin jasaımyz. Negizgi dári-dármekterden basqa biz gýmanıtarlyq kómek esebinen dárilik zattar men basqa da medısınalyq zattardy alamyz. Olar qoımalarda qalyp qoımaıdy. Óıtkeni olarǵa árdaıym qajettilik bar. Bizge kelgen naýqastar dári-dármekterdi jáne jalpy medısınalyq kómekti tolyq kólemde alady. Sondyqtan pasıentter tezirek saýyǵyp, úılerine oralady», — dedi Almaty qalasyndaǵy ftızıopýlmonologıa ortalyǵynyń ınfeksıa bóliminiń meńgerýshisi Abzal Dúısenbekuly.

Osy kúnderi №7 qalalyq klınıkalyq aýrýhananyń dárihana qoımasynyń medısınalyq qyzmetkerleri demalyssyz jumys isteıdi. Dári-dármekterge suranys kún saıyn artyp keledi. Al jańa jetkizilimdi túsirý jedeldikti qajet etedi.

«Qala ákimdiginiń qoldaýymen qajetti dári-dármekpen qamtamasyz etý retteldi. Keshe ǵana biz dári-dármektiń úlken partıasyn qabyldadyq», — dedi qalalyq №7 klınıkalyq aýrýhanasy bas dárigeri orynbasarynyń m. ý. a. Kúnsulý Jumabaeva.

Aýrýhana kópsalaly jáne ınfeksıalyq-provızorlyq kómek kórsetedi. Munda 300-den astam pasıent stasıonarlyq emdeýde jatyr. Qajetti dári-dármekterge suranys kún saıyn túsýde.

Keshe №7 qalalyq aýrýhanaǵa antıkoagýlánttar, gormonaldy, vırýsqa qarsy dáriler ıen antıbıotıkter tústi. Qazir bul preparattar qoraptan shyǵarylyp, bólimderge taratyldy. Medısınalyq personaldy dári-dármek jáne qorǵanys quraldarymen qamtamasyz etý 2 aıǵa qarastyrylǵan.

Jalpy, 1 shildeden bastap «SK-Farmasıa» JSHS-men birge mıllıonnan astam dári qaptamasyn jedel túrde qalalyq aýrýhanalarǵa jetkizý uıymdastyryldy. Onyń ishinde 437 myń antıbıotık, 77 myńnan astam antıkoagýlánt, 160 myń gormonaldy jáne 77 myń ystyq túsiretin dáriler bar. Qazirgi ýaqytta biryńǵaı operatormen aǵymdaǵy jyldyń tamyz aıynyń sońyna deıin rezervterdi qalyptastyrý boıynsha qosymsha kelisimderge qol qoıylýda.