Almaty ákimi Baqytjan Saǵyntaev qalanyń jańa nysandaryn kovıdtik gospıtálder retinde paıdalanýdyń daıyndyq barysymen tanysty.

Búgin qala ákimi jumys sapary barysynda №4 perzenthananyń jańa nysanynda boldy.

«Búgin №4 qalalyq perzenthananyń jańa korpýsyn qarap shyqtym. Munda COVID-19-ben aýyrǵandar úshin qosymsha 50 tósek-oryn ashylady. Koronavırýs ınfeksıasymen bosanatyn áıelderge arnalǵan gospıtáldy daıyndaý boıynsha qurylys-jóndeý jumystary aıaqtaldy. Qazir hırýrgıalyq, reanımasıalyq jabdyqtardy, ÓJJ apparattaryn qosý jumystary júrgizilýde. Sóıtip aptanyń sońyna qaraı bul jer KVI-men bosanatyn áıelderdi qabyldaýǵa daıyn bolady», — dep jazdy Baqytjan Saǵyntaev Instagram-daǵy paraqshasynda.

Ákim óziniń sózinde kovıdti stasıonar retinde jumys jasaıtyn perzenthananyń qýattylyǵy 105 tósek-orynǵa deıin jetetinin aıtty.

«Joǵary bilikti medısınalyq kómektiń der kezinde kórsetilýi arqasynda analar men jańa týǵan nárestelerdiń densaýlyǵy men ómiri saqtalatyn bolady», — dep atap ótti B. Saǵyntaev.

Sonymen qatar, Almaty ákimi COVID-19-ben kúresýde naýqastardy jatqyzatyn oryndardy kóbeıtý qajettiligine baılanysty salynyp jatqan arnaıy áleýmettik qyzmet kórsetý Ortalyǵy ǵımaratynyń qurylys barysymen tanysty, munda 500 tósek-orynǵa arnalǵan birinshi eshelon ınfeksıalyq stasıonar retinde qaıta beıimdeledi.

«Barlyq qurylys-jóndeý jumystary qarqyndy túrde júrgizilýde. Nysandy bir aıdan keıin tapsyrýdy josparlap otyrmyz», — dep jazdy B. Saǵyntaev.

Jańa kovıdtik gospıtál qajetti zamanaýı quraldarmen jáne medısınalyq gazben jabdyqtalady. Qazir kadrlardy daıarlaý jumystary júrýde. Munda gospıtál pasıentterine dıagnostıkalyq medısınalyq kómek tolyq kólemde kórsetiletin bolady.

Buryn habarlanǵanyndaı, kovıdti gospıtálder densaýlyq saqtaý nysandarynyń bazalaryna ornalasady,ıaǵnı olar qaıta jabdyqtalyp, sanıtarlyq-epıdemıologıalyq normalarǵa saı pármendi jumys jasaıtyn bolady.

Taza jáne kir aımaqtardy bóletin qorshaýlar, shlúzder, dezınfeksıalyq tonnelder ornatylýda, jeldetkish (ventılásıa) júıeleri jáne basqa da jumystar retke keltirilýde.