Almatyda tamyzdyń aıaǵyna deıin qosymsha kovıd stasıonarlary ashylady. Bul týraly óńirlik komýnıkasıa qyzmetiniń alańynda ótken onlaın-brıfıng barysynda Almaty qalasynyń Qoǵamdyq densaýlyq saqtaý basqarmasynyń basshysy Kamaljan Nadyrov málimdedi.

Osy aptada kelesi nysandar qaıta jasaqtaýdan ótken: «Qazaqstan» sanatorıı – 250 oryn, «Kóktem» – 376 oryn, «Samal» pansıonaty – 140 oryn, UOS múgedekterine arnalǵan respýblıkalyq klınıkalyq gospıtál – 100 orynǵa qaıta jasaqtalyp, qoldanýǵa beriletin bolady. Spıker bul jańa stasıonarlardyń qazir qyzmet etip jatqandarǵa qosymsha retinde ashylatynyn atap ótti.

Sonymen birge, aldaǵy ýaqytta megapolıste 500 orynǵa arnalǵan arnaıy áleýmettik qyzmetter kórsetý Ortalyǵy iske qosylady.

«Atalǵan ortalyq birinshi eshelondaǵy kovıdti klınıka retinde qyzmet etedi, al kovıdten keıingi kezeńde tolyqqandy kópsalaly stasıonar retinde qyzmet etedi. Qazir onda qurylys jumystary aıaqtalýda, onymen qosa medısınalyq tehnıka jáne qajetti mamandarmen qamtý máselesi de qaralýda. Atalǵan nysandy qyrkúıek aıynda ashý mindeti qoıylǵan», — dep habarlady K. Nadyrov.