Nur-Sultan qalasynyń ákimi Altaı Kólginov elordadaǵy densaýlyq saqtaý uıymdaryna túsken salmaq edáýir azaıǵanyn málim etti.

– Qazirgi kúni qalada koronavırýs ınfeksıasyn juqtyrǵandar sany – 10 320 adam. Jalpy 7260 adam nemese 70%-i jazylyp shyqty. Al sońǵy bir apta ishinde olardyń sany 1563-ti qurady. Iaǵnı naýqastardyń shamamen 25%-i ótken aptada saýyqty. 225 azamat qaıtys boldy. 1511 adam stasıonarlarda em alyp jatyr. Aýyr haldegi naýqastar sany 54,3%-ke azaıdy, – dedi Altaı Kólginov Úkimet otyrysynda.

Onyń aıtýynsha prezıdenttiń tapsyrmasyna sáıkes, úkimettiń qoldaýymen birqatar shara qabyldanǵan. Osynyń nátıjesinde karantın engizilgen sátten bastap KVI boıynsha jaǵdaıdyń naqty turaqtanýy baıqalady.

Altaı Kólginov densaýlyq saqtaý uıymdaryna túsken salmaq edáýir azaıǵanyn atap ótti. Atap aıtqanda:

– jedel járdemge júginý sany táýligine 4300-den 1600-ge deıin, ıaǵnı 3 esege tómendedi;

– KVI boıynsha jedel járdemge júginý 500-den 89-ǵa deıin, ıaǵnı 6 esege azaıdy;

– jalpy shaqyrýlar sany táýligine 3 myńnan 1000-ǵa deıin, nemese 3 esege tómendedi;

– pnevmonıamen jatqan azamattar sany 2 esege azaıdy (1348 den – 633 ǵa deıin);

– stasıonarlardyń júktemesi 99%-ten 38%-ke deıin tómendedi;

– eger buryn táýligine aýrýhanaǵa 500-ge jýyq pasıent túsetin bolsa, qazir 90-ǵa deıin azaıdy.

Derekkóz: QazAqparat