Prezıdent Qasym-Jomart Toqaev memlekettik komısıaǵa elde karantın rejımin taǵy eki aptaǵa uzartýdy tapsyrdy. Bul týraly Aqordanyń resmı saıty habarlady.

– Memleket basshysy shilde aıynda engizilgen shekteý sharalarynyń oń áserin odan ári arttyrý maqsatynda, sondaı-aq Qazaqstandaǵy jáne shekaralas memleketterdegi epıdemıologıalyq jaǵdaıdyń kúrdelene túsý yqtımaldyǵyn eskere otyryp, memlekettik komısıaǵa karantın sharalaryn kezeń-kezeńimen jeńildetý arqyly eki aptaǵa uzartýdy tapsyrdy, – dedi memleket basshysy.

Sonymen qatar keńeste premer-mınıstr Asqar Mamın prezıdentke 5 shildeden bastap elde qatań karantın sharalary engizilgennen keıin indet juqtyrýshylardyń sany 29 paıyzǵa tómendegenin baıandady. Bir kúnde indet juqtyratyn adamdardyń sany 1500-1600 aralyǵynda turaqtaǵan.

Stasıonarlardaǵy emdelýshilerdiń qatary 43 paıyzǵa, onyń ishinde, reanımasıalyq palatalardaǵy naýqastar sany 27 paıyzǵa azaıǵan. Saýyǵyp shyqqandardyń sany 63 paıyzǵa deıin ósken. Jedel-járdem shaqyrý jaǵdaıy tómendegen. Osylaısha densaýlyq saqtaý júıesiniń negizgi júkteme kórsetkishin tómendetýge qol jetkizilgen.