Malaızıanyń eks-premeri Nadjıb Razakqa sot jemqorlyq jasady, memlekettik ınfestısıalyq qor qarjysyn jymqyrdy degen aıyppen 12 jylǵa túrmege qamaý týraly úkim shyǵardy, dep jazady holanews.

Nadjıb Razakqa korrýpsıa, qyzmetin asyra paıdalaný, 1MDB qorynyń kómegimen aqsha jymqyrý deregi boıynsha 42 aıyp taǵylyp otyr. Oǵan 49,3 mıllıon dollar aıyppul tóleýge mindetteldi.

Eks-sheneýnik appelásıalyq shaǵym qaralyp jatqanda ýaqytsha bostandyqta bolady. Ol úlken somada kepil aqsha tólep, eki aptada bir ret polısıaǵa belgilenip turýǵa tıis.

Tergeý barysynda anyqtalǵan derekke sáıkes, aıyptalýshy qor qarjysyn úkimet múshelerin satyp alýǵa, óziniń astyrtyn qorlaryn qarjylandyrýǵa, qymbat buıymdar, kartınalar, jyljymaıtyn múlik satyp alýǵa jumsaǵan.

AQSH bıligi aıyptalýshy ınvestısıalyq qordan 4,5 mıllıard dollardy ıahta, óner buıymdary men lúks sanattaǵy jyljymaıtyn múlik satyp alýǵa qurtqan dep jobalaıdy.

Al eks-sheneýnińktiń ózi taǵylǵan aıyptaýdyń barlyǵyn teristep otyr. Sózinshe, eshqandaı zańsyz operasıa týraly bilmeıdi.

Nadjıb Razaktyń qyzy Danıar Nazarbaevqa turmysqa shyqqan. Danıar Nazarbaev Qazaqstan eks-prezıdentiniń inisi Bolat Nazarbaevtyń burynǵy áıeli Maıra Qurmanǵalıevanyń uly.

Nadjıb Razak Reuters-ke bergen suhbatynda úıin tintý kezinde tabylǵan 300 qorap qymbat buıymdar men sómkeler ózderine syılyqqa berilgenin, onyń kóbin kúıeý balasy Danıar Nazarbaev syılaǵanyn aıtqan.