Belsendi Rýslan Janpeıisov bir jylǵa bas bostandyǵynan aıyryldy. Bul týraly Shymkent qalalyq sotynyń baspasóz qyzmeti habarlady. 

Janpeıisovke úkim búgin shyǵarylǵan. Qalalyq sottyń baspasóz qyzmeti taratqan habarlamaǵa qarǵanda ol jábirlenýshige aýyrlyǵy ortasha dene jaraqatyn qasaqana keltirgeni, sondaı-aq bılik ókilin qorlaǵany jáne telekomýnıkasıa jelisinde beınejazba taratqany úshin kináli dep tanylǵan.

Sot úkimine saı, ol qaýipsizdigi barynsha tómen qylmystyq-atqarý júıesi mekemeleriniń birinde jazasyn óteıdi. 

Buǵan qosa, sot talapker-jábirlenýshilerdiń talap aryzdaryn qanaǵattandyryp, Janpeıisovtan 550 myń teńge óndirip aldy.

"Sot isti qaraý kezinde sottalǵan adamnyń aerozoldi buryshpen zarádtalǵan tapansha túrindegi aerozoldi qurylǵyny qoldana otyryp, jábirlenýshiniń kóz aımaǵyna oq atqanyn, sońǵysyna eki kózdiń hımıalyq kúıigin keltirgenin, bul kórý ótkirliginiń tómendeýine ákep soqtyrǵanyn anyqtady. Sonymen qatar, ol qoǵamdyq orynda óziniń qyzmettik mindetterin atqarý kezinde júrgen polısıa qyzmetkeri K.-ny kópshilik aldynda qorlady jáne kópshilikke qoljetimdi ınternet  arnaǵa beınejazba jarıalady"  delingen sot habarlamasynda.

Sot habarlamasynda Janpeıisov ózine taǵylǵan "qasaqana dene jaraqatyn keltirdi" dep aıypty moıyndamaǵyn aıtylady.  

Shymkent qalasynyń turǵyny Rýslan Janpeıisov – polısıa qyzmetkerleriniń jumysyn synǵa alyp vıdeo túsiretin belsendi bloger. Ol buǵan deıin de birneshe ret qamalǵan. 

Sońǵy ret Janpeıisov bıyl 14 sáýirde ákimshilik quqyq buzýshylyq úshin 25 táýlikke qamaýǵa alyndy. Keıin qamaýǵa alý merzimi 40 kúnge deıin uzartylǵan. 

Keıin belsendi bostandyqqa shyǵyp, polısıa qyzmetkerlerin vıdeoǵa túsirmeýge ýáde bergen edi.