Kredıt amnıstıasyn jarıalaý bastamasyn kóterip, 100 myńǵa tarta adamnan qol jınaǵan qoǵam belsendisi Janbolat Mamaı men onyń jaqtastary jınalǵan aryzdardy prezıdent ákimshiliginiń kanselárıasyna ótkizdi.

Buǵan deıin demokratıalyq partıa qurý boıynsha bastamashyl top jetekshisi Janbolat Mamaı pandemıa kezinde halyqtyń turmysy tómendep, áleýmettik jaǵdaıy nasharlaǵanyn aıtyp, osydan birneshe aı buryn birrettik nesıe amnıstıasyn ótkizý bastamasyn kótergen. Bastamany el boıynsha 100 myńǵa jýyq adam qoldaǵan.

Qoǵam belsendisi 4 tamyz saǵat 11:00-de Aqordaǵa 100 myń adamnyń aryzyn tapsyrýǵa baratynyn birneshe kún buryn habarlaǵan. Mamaı men onyń jaqtastary keshe Nur-Sultan qalasyna kelgen.

Ýádeli ýaqytta Aqordaǵa qaraı bettegen belsendilerdi polısıa qyzmetkerleri prezıdent rezıdensıasyna qaraı ótkizbeı turdy.

Artynsha Aqordadan bılik ókili shyǵyp, belsendilermen kelissóz júrgizdi. Kelissóz nátıjesinde belsendilerden 5-6 adam prezıdent ákimshiliginiń kanselárıasyna kirip, aryzdardy ótkizdi.

Janbolat Mamaıdyń facebook-tegi paraqshasynda júrgen tikeleı efırden belsendilerdiń ǵımarat ishinde aryzdardy túgendep, ótkizgenin kórýge bolady.

Belsendi Janbolat Mamaı "aryzdardy Aqordaǵa tapsyrdyq! Halyqtyń amanaty oryndaldy" dep aıtty.