QR Prezıdenti Nursultan Nazarbaev 24-25 qazan kúnderi Mınskide ótetin Joǵary ekonomıkalyq keńestiń jáne Táýelsiz Memleketter dostastyǵy keńesiniń kezekti otyrysyna qatysady.

 Bul týraly búgin QR Prezıdenti janyndaǵy Ortalyq komýnıkasıalar qyzmetiniń resmı ókili Altaı Ábıbýllaev málim etti.

«Eýrazıalyq ekonomıkalyq keńes aıasynda Qazaqstan Keden odaǵynyń ózekti problemalary men damý perspektıvalaryn talqylaýǵa nıetti.Sondaı-aq, Eýrazıalyq ekonomıkalyq komısıa alqasynyń músheleri men qyzmetkerlerine baılanysty jáne 2012 jylǵy komısıa búdjetiniń oryndalýyna qatysty mańyzdy sheshimderge qol qoıý josparlanýda», - dedi ol.

Onyń sózine qaraǵanda, TMD memleketteri basshylary keńesiniń kúntártibinde 14 máseleni talqylaý kózdelip otyr. Otyrys qorytyndysy boıynsha mańyzdy qujattarǵa, onyń ishinde qupıa aqparattardy qorǵaý, jemqorlyqqa qarsy turý boıynsha memleketaralyq keńes qurý týraly kelisimder bar.

«Memleket basshylarynyń basty nazarynda TMD aýmaǵynda 2015 jyldy Uly Otan soǵysy ardagerleriniń jyly dep jarıalaý jáne Uly jeńistiń 70 jyldyǵyn merekeleý boıynsha basqa da birlesken sharalar bolmaq», - resmı ókil.

Budan bólek, A.Ábıbýllaevtyń atap ótýinshe, Mınskidegi Prezıdentter kezdesý qarsańynda, ıaǵnı 24 qazan kúni QR SİM Erlan Ydyrysov jáne QR Qorǵanys mınıstri Ádilbek Jaqsybekovtiń qatysýymen TMD Syrtqy ister mınıstrleri keńesi men Qorǵanys mınıstrleri keńesiniń kezekti otyrysyn ótýi josparlanǵan.

"QazAqparat"