Bıbijamal Ablazımovanyń janazasyna karantınge qaramaı kóp adamnyń jınaýy jelide qyzý talqylatyp jatyr. Máselege qatysty marqumnyń ápkesi Kúljan Syrbaıqyzy Mańǵystaý turǵyndaryna beıneúndeý joldady.

Marqumnyń ápkesi eldegi karantınde eskerip jerleý rásimine eshkimdi shaqyrmaǵanyn atap ótti. Jınalǵan adamdarǵa medısınalyq maskalar, antıseptıkter taratylyp, túsindirme jumystary júrgizilgen. 

– Áýletimiz aýyr qazaǵa ushyrap, qıyn jaǵdaıǵa tap boldy. Biz jerleý rásimine eshkimdi de shaqyrǵan joqpyz. Kelgen adamdarǵa esigimizdi "Ket" dep jaba almadyq. Barlyq sanıtarlyq talaptar saqtaldy. Teris túsinbeńizder. Ketken qatelikterimiz bolsa aıyp etpeńizder. Zańbuzýshylyqqa jol berip, aıyppul tóleý qajet bolsa, tóleımiz. Bizge halyqtan bıik eshkim joq. Halyq bolmasa biz kimbiz?! Barsha qazastandyqtardan keshirim suraımyn. Marqum anamyz ólim aýzynda jatqanda balalarynan ony jerleý jáne eske alý rásimine eshkimniń kelmeýin surady. Bolǵan jaǵdaıǵa túsinistikpen qaraýlaryńyzdy ótinemin!, – dedi ápkesi Kúljan Syrbaıqyzy.

Aıta keteıik, polısıa general-maıory, BQO polısıa departamentiniń basshysy Maqsuthan Áblázimov pen kásipker Baharıdın Áblázimovtiń anasy Bıbijamal Áblázimova 79 jasynda qaıtys bolǵan. Jerleý rásiminiń vıdeosy áleýmettik jelide keńinen tarady. Vıdeodan karantınge qaramastan jerleý rásimine júzdegen qala turǵyny jınalǵanyn kórýge bolady. Sondaı-aq tártip saqshylarynyń joldy jaýyp tastaýy adamdardyń narazylyǵyn týdyrǵan.

Oqıǵadan keıin aqtaýlyq belsendiler oblystyq polısıa departamentiniń bastyǵy general-maıor Janarbek Baqtybaev pen oblystyq densaýlyq saqtaý dárigeri Erǵalı Sydymanovtyń otstavkaǵa ketýin talap etýde. 

İshki ister mınıstrligi Aqtaý qalasynda adam kóp jıylǵan janazaǵa qatysty tekseris jumystaryn bastady.