Qazaqstan H5N8 qaýipti vırýsy belgileriniń tabylýyna baılanysty Reseıden tasymaldanatyn keıbir taýyq ónimderine shekteý qoıdy, dep habarlady aýyl sharýashylyǵy mınıstrligi.

"3-4 tamyzda veterınarlyq jáne fıtosanıtarlyq qadaǵalaý boıynsha federaldy qyzmettiń Chelábınskidegi basqarmasy aımaqta anyqtalǵan qus tumaýy vırýsynyń genetıkalyq belgileri týraly aqparat taratty. Óli qustardan alynǵan barlyq synamada H5N8 tumaýy vırýsynyń kishi túri anyqtaldy.

Qustardyń barlyq túri tumaýdy tez qabyldaıtyny belgili. Bul – aýyl sharýashylyq, sınantropty jáne jabaıy qustarǵa jyldam juǵatyn ári lezde taraıtyn vırýstyq aýrý. Sondyqtan, qus tumaýynyń jappaı taralyp ketý qaýpi bar.

Osyǵan baılanysty Ývel aýdanaralyq veterınarlyq zerthanasy, Chelábi synaq zerthanasy jáne Vladımır qalasyndaǵy janýarlardyń densaýlyǵyn saqtaý federaldy ortalyǵy jasaǵan dıagnoz negizinde Qazaqstan aýmaǵynda epızootıkalyq talaptardy saqtaý maqsatynda aýyl sharýashylyǵy mınıstrliginiń veterınarlyq baqylaý jáne qadaǵalaý komıteti 2020 jyldyń 4 tamyzynan bastap Chelábınsk oblysynan termıalyq óńdeýden ótpegen qustarǵa arnalǵan jemshóp qospalary (hımıalyq jáne mıkrobıologıalyq sıntezdiń qospalarynan basqa), taksıdermıalyq óńdeýden ótpegen aýlanǵan oljalar (tiri qustar, jumyrtqalar, qus eti jáne qus etiniń barlyq túrleri), sonymen qatar qustardy ustaýǵa, soıýǵa jáne kesýge qoldanylatyn qural-jabdyqtar ákelýge jáne tasymaldaýǵa ýaqytsha shekteý engizdi.

Shekaralas aımaqtardaǵy epızootıalyq jaǵdaıdy oblystardyń veterınarlyq qyzmeti erekshe baqylaýǵa aldy" delingen mınıstrlik taratqan habarlamada