Keshe QR Premer-mınıstri Asqar Mamınniń tóraǵalyǵymen ótken memlekettik komısıa otyrysynda qalyptasqan epıdemıologıalyq jaǵdaıdy eskere otyryp, karantın sharalaryn kezeń-kezeńimen alyp tastaý jospary qaraldy. 

Osyǵan baılanysty Nur-Sultan qalasy Dermatologıa ortalyǵynyń dırektory, medısına ǵylymdarynyń doktory Juldyz Danbaeva shekteý sharalaryn jeńildetýden eshqandaı qorqynysh joq ekenin aıtty. 

– Qazir eldegi epıdemıologıalyq jaǵdaı turaqtaldy. Syrqattanýshylar sany da azaıyp keledi. Halyq sanıtarıalyq normalardy oryndap, maska taǵý rejımin saqtap, áleýmettik qashyqtyqty ustansa, shekteý sharalaryn jeńildetýden eshqandaı qorqynysh joq. Shet memleketterde de osy erejelerdi saqtap, karantındi birtindep jeńildetip jatyr. Ol bir jaǵynan halyqtyń sana-sezimine baılanysty. İndettiń taralý deńgeıi qoǵamnyń árbir múshesiniń áreketine, ár qadamyna tikeleı baılanysty, – deıdi ol.

Aıta ketý kerek, memlekettik komısıa 2020 jyldyń 17 tamyzynan bastap barlyq óńirde jumysyn qaıta bastaıtyn kásipkerlik sýbektileri qyzmet túrlerinİń tizbesin bekitti.