Sybaılas jemqorlyqqa qarsy is-qımyl agenttigi Almaty qalalyq polısıa departamentiniń laýazymdy tulǵasyn para alyp jatqan jerinen ustady.

"800 myń teńge somasynda kezekti aqshalaı qarajat somasyn alý barysynda Almaty qalasy polısıa departamentiniń Prosesıngtik ortalyǵynyń basshysy men qyzmetkeri ustaldy" delingen agenttik taratqan habarlamada.

Olar 2017 jyldan bastap "jalǵan sot oryndaýshysymen" sóz baılasyp, jol qozǵalysy erejelerin buzýshylardan qarajat alyp, ózderine ıemdengen.

"Avtomattandyrylǵan derekter bazasyna búdjetke túsken aqsha qarajaty týraly jalǵan málimetter engizildi.

Tek aldyn ala derekter boıynsha, atalǵan tulǵalardyń qylmystyq áreketterinen memleket búdjetine 25 myńnan astam ákimshilik quqyq buzýshylyq jasaǵany úshin 270 mln teńgeden astam qarjy túspegen. Atalǵan tulǵalar ustalyp, ýaqytsha ustaý ızolátoryna qamaldy" delingen habarlamada.

Qazirgi ýaqytta atalǵan tulǵalardyń basqa qylmystarǵa qatystylyǵy týraly faktileri tekserilýde.