"Qazaqfılm" AQ basshysy, kınorejısser, prodúser Aqan Sataev 14 tamyz kúni kınostýdıa ǵımaratynda shyqqan órtke qatysty pikir bildirdi.
"Qazaqfılmdi" bireýdiń órtegendigi anyq. Baqytymyzǵa oraı, zardap shekkender joq. Bizge qatty zıany kelmedi. Sondyqtan biz óz jumysymyzdy jalǵastyramyz. Men bul qylmyskerlerdi tabamyz dep senemin" dedi dırektor óziniń Instagramdaǵy paraqshasynda.
Rejıser "Qazaq handyǵy" serıalyn túsirý kezinde jasalǵan kólemdi dekorasıanyń órtenip ketkenin málimdedi. Dekorasıadan 200 metr qashyqtyqta órtengen ekinshi nysan - aǵash qoımasy.
A.Sataev órt sóndirýshilerge jáne qala basshylyǵyna tótenshe jaǵdaıdy tez jáne tıimdi sheshkenderi úshin alǵys aıtty.
Almaty qalasynyń tótenshe jaǵdaılar departamentiniń málimetine sáıkes, 21.33-te bastalǵan órttiń birinshi oshaǵy 23 saǵat 10 mınýtta, al ekinshisi 23 saǵat 26 mınýtta joıylǵan. Órtti sóndirýge TJ departamentinen 53 qyzmetker men 16 birlik tehnıka, polısıa departamentinen 30 qyzmetker men 10 birlik tehnıka, jedel medısınalyq kómek mekemesinen 6 qyzmetker, 2 birlik tehnıka jáne Almaty qalasy ákimi apparatynyń qutqarý qyzmetinen 4 jumysker men 4 birlik tehnıka jumyldyryldy.
