Qazaqstan ulttyq ulany bas qolbasshysynyń orynbasary Muhametqalı Satov qaıtys boldy. Bul týraly vedomstvonyń resmı saıty jarıalady.

"Qazaqstan Respýblıkasy Ulttyq ulanynyń bas qolbasshylyǵy, Áskerı jáne Ardagerler keńesi ulttyq ulan bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Satov Muhametqalı Qusaıynulynyń mezgilsiz qaıtys bolýyna baılanysty marqumnyń týǵan-týystarynyń qaıǵysyna ortaqtasyp kóńil aıtady" delingen habarlamada.

Muhametqalı Qusaıynuly 1961 jyly 29 maýsymda Qaraǵandy qalasynda dúnıege kelgen.

1978-1982 jyly KSRO İİM Novosibirdegi joǵary áskerı ýchılıshesin, 2013 jyly Kókshetaý qalasyndaǵy A.Myrzahmetov atyndaǵy ýnıversıtette memlekettik jáne jergilikti basqarý mamandyǵy boıynsha bilim alǵan.

1999-2001 jyldary İİM ishki áskerler qolbasshylyǵy bas basqarmasynyń áskerı keńes hatshysy, 2005 jyldan 2013 jyldyń mamyryna deıin – Qazaqstan Respýblıkasy İİM ishki áskerleriniń komıteti – ishki áskerler bas qolbasshylyǵynyń tárbıe jáne áleýmettik-quqyqtyq jumystar bas basqarmasynyń bastyǵy, 2013 jyldyń 25 mamyry men 2014 jyldyń mamyry aralyǵynda Qazaqstan Respýblıkasy İİM ishki áskerler bas qolbasshysynyń tárbıe jáne áleýmettik-quqyqtyq jumystar jónindegi orynbasary, 2014 jyldyń 20 mamyrynan bastap Qazaqstan Respýblıkasy ulttyq ulany bas qolbasshysynyń tárbıe jáne áleýmettik-quqyqtyq jumystar jónindegi orynbasary qyzmetterin atqarǵan.

Qazaqstan Respýblıkasy prezıdentiniń 2016 jylǵy 5 mamyrdaǵy Jarlyǵymen "general-maıor" shenin alǵan.