Taldyqorǵan qalasynyń ákimi Ǵalymjan Ábdiraıymov karantın ýaqytynda qaıyrymdylyq kórsetip, ıgi sharalarǵa atsalysqan kásipkerlerdi marapattady.

Alǵys hatpen marapattalǵandardyń qatarynda jeke kásipker Dınara Taıjanovaǵa «Ana júregi», Erjan Barysovqa «Otan patrıoty» medali tabystaldy.

«Álemdi dúrliktirgen koronavırýs indeti elimizdi de aınalyp ótpedi. Alaıda Memleket Basshysy Qasym-Jomart Toqaevtyń der kezinde tapsyrma berip, Almaty oblysynyń ákimi Amandyq Ǵabbasulynyń qoldaýynyń arqasynda indettiń aldyn alý men boldyrmaýǵa qatysty tıisti is-sharalar atqarylýda. «Jumyla kótergen júk jeńil» demekshi, qıyn sátte jany jaısań azamattarymyz janymyzdan tabylyp, qaıyrymdylyq kómekterin usynǵany quptarlyq is boldy. Jomart jandardyń qarapaıym bolyp keletindigi belgili, keıbir azamattar nasıhattaýdy qajet etpeıdi. Alaıda, ózderińizdeı jomart júrekti azamattardy erekshe atap ótkim keledi. Árdaıym halyqtyń alǵysyn arqalap, isterińiz berekeli bola bersin demekpin. Elimizdiń órkendeý jolynda atqarylyp jatqan ıgi qyzmetterińizge tabys, otbasylaryńyzǵa jaqsylyq, denderińizge saýlyq tileımin. Táýelsizdigimiz tuǵyrly, eldigimiz ǵumyrly bolsyn!», — dedi Ǵ.Ábdiraıymov.

Sondaı-aq, jıyn barysynda qalalyq ardagerler keńesiniń basshysy A.Kerimbekov, qoǵamdyq keńestiń tóraǵasy J.Meırembaev jáne máslıhat hatshysy A.Temirbolat ıgi istiń uıytqysy bolyp júrgen kásipkerlerge rızashylyqtaryn aıtyp, ystyq yqylastaryn bildirdi.

Al, demeýshiler atynan sóz alǵan «Taldyqorǵan-KOMFORT» JK dırektory, kásipker Dáýren Talıpov:

— Bizdiń qaýymdastyqtyń qurylǵanyna alty aı boldy. Osy ýaqyt aralyǵynda komandamyzǵa seksen jas kásipker keldi. Negizgi maqsatymyz muqtaj jandarǵa kómek kórsetip, qaıyrymdylyq sharalaryn uıymdastyrý, ekinshiden jas kásipkerlerdiń deńgeıin joǵary dárejege kóterý. Sonymen qatar qalamyzǵa syrttan ınvestısıa tartý josparymyzda bar, — dep atap ótti.

Pandemıa kezinde qoldaý kórsetken kásiporyndardyń aldyńǵy qatarynda quramynda birneshe óndiristik jáne servıstik kásiporyndardy biriktirip otyrǵan «ASPMK-519» JSHS, akýmýlátordyń kóptegen túrin shyǵaryp, elimizge jáne shet memleketterge tanymal bolyp otyrǵan «Qaınar-AKB» JSHS syndy iri óndiris oshaqtary bar. Aıta keteıik, Taldyqorǵan qalasynyń ákimdiginde koronavırýs ınfeksıasyna qarsy kúres uıymdastyrý úshin arnaıy shtab qurylǵan bolatyn. Onyń quramynda kásipkerler men densaýlyq saqtaý ardagerleri jáne qoǵam qaıratkerleri bar. Shtab qurylǵaly demeýshilerdiń qoldaýymen osy ýaqytqa deıin 100-den asa ottegi apparattary aýrýhanalarǵa tabystalǵan.

Aıdar QALIEV