Tramp ákimshiliginiń sheneýnigine qazaqtyń qamshysyn qoldanyp, qol astyndaǵylarǵa "zorlyq-zombylyq jasaǵany" úshin shaǵym túsken. "Qamshy" tilshisi The Washington Post basylymynyń deregin negizge ala otyryp, Tramp ákimshiligindegi etıket pen hattamalarǵa jaýapty ishki bólimshedegi qyzmetkerler keıbir quqyqbuzýshylyqtar úshin shaǵymdanǵanyn habarlaıdy. Shaǵymdar týraly baıandamany memlekettik departamenttiń ishindegi baqylaýshylar (Watchdog) jarıalaǵan.

Baıandama boıynsha, Tramp ákimshiligine qarasty hattamalar bóliminiń burynǵy basshysy Shon Loýler "jumys ornyndaǵy zorlyq-zombylyq" dep sanaýǵa bolatyn áreketter  jáne qyzmettik etıketke qaıshy ister jasaǵan.

Aqparatqa sáıkes, Loýler keńsesinde turǵan qazaqtyń qamshysyn qoldanyp, qyzmetkerlerge qyr kórsetken. Basylymnyń jazýynsha, basshynyń qamshysyn Qazaqstannan kelgen dıplomattar syıǵa bergen. 

"Zardap shekti" delingen qyzmetkerler The Washington Post-ke bergen suhbatynda Loýlerdiń geı qyzmetkerlerdi kemsitip, olarǵa qurmetsizdik tantqanyn jetkizgen. Memlekettik departamenttiń eki qyzmetkeriniń aıtýynsha, burynǵy basshy Kaıl esimdi geı qyzmetkerdi "Kaılı" dep kemsitip shaqyrǵan.

Qyzmetkerlerdiń sózinshe, Loýler japon dıplomattarynyń toby "geı juldyzdaryna uqsaıtynyn" aıtyp, olardyń syılyqtaryn qalamaıtynyn jetkizgen.

Qyzmetkerler "Loýler basqa da qorlaıtyn pikirler aıtty" dep málimdegen. Shaǵymdanýshylardyń sózinshe, bir top túrik azamattary hattamalar keńsesine kelgennen keıin Loýler  olardy "las" adamdar sıaqty "jıirkenishti" degen.

Degenmen, memlekettik departament basshylyǵy baıandamanyń tujyrymdaryn qatań túrde joqqa shyǵardy jáne jáne baqylaýshylardyń aqparattaryna kúmán keltirdi.

Gazettiń aqparatyna sáıkes, Loýler hattama basshysy qyzmetinen bosatylǵan.