Almaty qalasynyń bas memlekettik sanıtar dárigeri Jandarbek Bekshın mıtıńige shyǵatyn belsendilerge eskertý jasady. Bul týraly ol óńirlik komýnıkasıalar qyzmetinde ótken onlaın brıfıńte aıtty.

– Sońǵy kezde áleýmettik jelelirde mıtıńter men kópshilik sharalarǵa úndeıtin aqparattar taralyp júr. Bas memlekettik sanıtardyń 14 tamyzdaǵy №47 qaýlysy boıynsha kóp adam shoǵyrlanatyn sharalarǵa áli tyıym salynǵan, – dep atap ótti Bekshın.

Ol óz sózinde mıtıńti uıymdastyrýshylar zań aldynda jaýap beretinin basa aıtty.

– Halyqtyń kóp jınalýyna úndeýdi qoıý qajet. Onymen adamdarǵa qaýip tóndiresizder. Qatań karantındik sharalardyń arqasynda qaladaǵy epıdemıologıalyq jaǵdaı jaqsardy. Alaıda normalar saqtalmasa, jaǵdaı taǵy qıyndap ketýi ábden múmkin, – dedi bas memlekettik sanıtar dárigeri.