UBT-da kezekshi muǵalim talapkerge test suraqtaryn sýretke túsirýge kómektesken. Ulttyq testileý ortalyǵynyń dırektory Dıdar Smaǵulov Facebook paraqshasynda oqıǵanyń vıdeosyn jarıalady.

– Konstıtýsıa kúnine sáıkes kelip, mereke kúni 97 balaǵa arnalǵan jaqsy jańalyq! UBT beınejazbalarynyń qorytyndysy boıynsha 158 testilenýshiniń nátıjeleri joıyldy, olardyń 97-si grant ıegeri atanǵan bolatyn (sonyń ishinde 138 bal alǵan túlek te bar). Soǵan oraı, ádil tapsyrǵan, biraq grantqa ótpegen 97 bala 2 apta ishinde grant ıegerleri atanyp, tirkeletin bolady, – dep jazdy ol.

Onyń aıtýynsha,  tártipti qamtamasyz etetin kezekshiniń ózi qylmystyq áreketke barǵany anyqtaldy. 

– "Batyrlyqpen" suraq kitapshasyn fotoǵa túsirip otyrǵan balany denesimen jaýyp tur. Kem degende onyń bilim berý salasynan jumystan bosatylýyn, al odan beter shara retinde qatal jaýapkershilikke tartylýyn talap etetin bolamyz, – dep jazǵan jelidegi paraqshasynda.