Memleket basshysy Qasym-Jomart Toqaev parlament palatalarynyń birlesken otyrysynda Qazaqstan halqyna jyl saıynǵy dástúrli joldaýynda eldegi pandemıa týraly aıtty. 

– Pandemıa barlyq memleketter úshin synaq kezeńine aınaldy. Olar indetpen kúres jolynda kóp qıyndyqty bastan ótkerýde. Bir jerde ahýal turaqtansa, ekinshisinde vırýstyń jańa oshaqtary paıda bolýda. Úkimet jiberilgen qatelikterden sabaq alyp, jumysty jedel jolǵa qoıa bildi. Eń bastysy – biz azamattardan eshnárseni jasyrmaı, indetten qaıtys bolǵandar týraly aqparattyń barlyǵyn ashyq jarıaladyq. Qanshalyqty ashshy bolsa da, shyndyqty aıtyp otyrmyz. Bul – keıbir memleketterge qaraǵanda Qazaqstannyń utymdy tusy. Alaıda, ahýaldyń jaqsarýy bosańsýǵa sebep bolmaýǵa tıis. Kúres áli jalǵasýda, – dep atap ótti Toqaev.

Onyń aıtýynsha Dúnıejúzilik densaýlyq saqtaý uıymynyń boljamy boıynsha pandemıany jeńý úshin kem degende 2 jyl qajet. 

– Aldaǵy aılarda kúsh-jigerimizdi barynsha jumyldyra jumys isteıtin bolamyz. Osyǵan daıyn bolýymyz kerek. Másele týyndaǵan kezde ǵana shuǵyl qımyldamaı, aldyn ala sharalar qabyldap, barlyǵyn jan-jaqty oılastyryp jumys isteýimiz kerek. Barlyq sheshimder muqıat tekserilgen boljamdarǵa negizdelýge tıis. Úkimet naqty shekteýler men beıimdi karantın ádisin engizýde. Pandemıamen kúres jóninde keshendi baǵdarlama ázirlenedi,– dedi prezıdent.