Qazaqstan prezıdenti Qasym-Jomart Toqaev parlament palatalarynyń birlesken otyrysynda qazaqstandyqtarǵa joldaý jasap, aýyl sharýashylyǵyn damytý týraly sóz qozǵady.

– Aýyl sharýashylyǵyn damytpaı, básekege qabiletti ekonomıka qurý múmkin emes. Bul salada sheshimin tappaı kele jatqan ózekti máseleler bar. Atap aıtqanda, jurttyń jerge qol jetkize almaýy, uzaq merzimge beriletin «arzan nesıeniń» bolmaýy, kásibı mamandardyń tapshylyǵy. Ónimdilikti arttyryp, shıkizat óndirýmen ǵana shektelmeý úshin, sondaı-aq qoıma jáne kólik ınfraqurylymyn damytý maqsatynda shuǵyl sharalar qabyldaý kerek. Elimizde et, jemis-jıdek, kókónis, qant, bıdaı, maıly daqyldar, sút ónimderin óndirý jáne óńdeý úshin 7 iri ekojúıe qalyptastyrýǵa bolady. Balyq sharýashylyǵyna da erekshe mán bergen jón, – dedi Qasym-Jomart Kemeluly.

Ol óz sózinde qosymsha qun qalyptastyrýdyń ózegi sanalatyn iri jobalar mańyzdy ról atqarýǵa tıis ekenin aıtty.

– Vertıkaldi kooperasıa aıasynda jeke qosalqy sharýashylyqtyń áleýetin paıdalanǵan abzal. Jeke sharýashylyq mıllıondaǵan aýyl turǵyndaryna tabys tabýǵa múmkindik bere alady. Olardy óńirlik azyq-túlik habtaryn qurýǵa jumyldyrý kerek. Biz gorızontaldi kooperasıanyń áleýetin de esten shyǵarmaýymyz qajet. Onsyz agroónerkásip kesheninde qarqyndy damý bolmaıdy. Basy birikpegen jeke qosalqy sharýashylyqtar, shyn máninde, ólmestiń kúnin kórip otyr. Bul rette, sapaly ári mol ónim óndirý, úzdiksiz taýar jetkizý týraly sóz qozǵaýdyń ózi orynsyz. Básekege qabiletsizdik pen ımporttan aryla almaı otyrýymyzdyń sebebi de osyda. Kooperasıa kezinde jer jáne basqa da múlikke qatysty barlyq quqyqtar saqtalady. Kooperasıa sharýashylyqtarǵa shıkizat satyp alý, ónim óndirý jáne  ony satýdy uıymdastyrý barysynda kúsh jumyldyrýǵa múmkindik beredi. Aýyl eńbekkerleriniń aýyr jumysy tym arzan baǵalanady. Bul – jasyryn emes. Tabystyń basym bóligine alypsatarlar kenelip jatady. Sondyqtan, sýbsıdıa jáne salyq jeńildikterin berý baǵdarlamalary aıasynda aýyldyq jerlerdegi kooperasıany yntalandyrý úshin tıisti sharalar toptamasyn ázirleý qajet, – dedi ol.