«Aq jol» Demokratıalyq partıasy daǵdarystan keıingi el damýynyń máselelerine arnalǵan Prezıdent Joldaýynyń negizgi qaǵıdalaryn talqylady, dep habarlaıdy QazAqparat saıası uıymnyń baspasóz qyzmetine silteme jasap.

Joldaýdy talqylaýǵa partıa tóraǵasy Azat Perýashev, Ortalyq keńes prezıdýmynyń músheleri, Májilis depýtattary, «Aq jol» partıasynyń belsendileri qatysty. İs-shara óńirlerdegi partıa fılıaldarymen beınekonferensıa rejıminde ótti.

Azat Perýashev partıa múshelerine Joldaýdyń negizgi baǵyttary men Memleket basshysynyń úkimet pen memlekettik organdardyń aldyna qoıǵan tapsyrmalary týraly habarlady.

«Memleket basshysynyń Joldaýy mańyzdy bólimderden turady jáne belgilengen baǵyttardyń árqaısysy naqty tapsyrma túrinde berildi. Joldaý reformalyq sıpatta qurylǵan» - dedi Azat Perýashev.

«Akjoldyqtar» bıznesti qoldaý jónindegi kóptegen tapsyrmalardy, zardap shekken shaǵyn jáne orta bıznes sektorlarynyń barlyq nesıeleri boıynsha paıyzdyq mólsherlemelerdi sýbsıdıalaý, agroónerkásiptik keshendi qoldaý, bıznes ahýaldy jaqsartý jáne taǵy basqa máselelerdi atap ótti. Sonymen birge, talqylaý barysynda memlekettik basqarý salasyndaǵy Prezıdent tapsyrmalaryna, Strategıalyq josparlaý agenttigin, Reformalar jónindegi Joǵary Prezıdenttik keńesti, Básekelestikti qorǵaý jáne damytý jónindegi agenttigin qurýǵa, memlekettik qyzmetkerlerdiń shtatyn qysqartý, jaýapty hatshylar ınstıtýtyn taratýǵa qoldaý bildirdi.

«Bıznes partıasynyń ókilderi retinde eldiń jańa ekonomıkalyq baǵytynyń basty qaǵıdalarynyń biri bolyp jeke kásipkerliktiń jetekshi róliniń atalǵanyn estip qýanyp qaldyq», – dep atap ótti partıanyń Qaraǵandy oblystyq fılıalynyń ókilderi.

Depýtat Berik Dúısembınov Joldaýda qoıylǵan máseleler kóp jaǵdaıda «Aq jol» partıasy kóterip kele jatqan jaıtttarmen úndes ekenin aıtyp jáne partıanyń saılaýaldy jumysyn jalǵastyrýǵa shaqyrdy. Sondaı-aq, Májilis depýtaty 2018 jyly «Aq jol» partıasynyń fraksıasy bılik ókilderiniń qos azamattyǵy úshin qylmystyq jaýapkershilikti engizýdi týraly usynysy búgin Prezıdent tapsyrmalarynyń ishinde aıtylǵanyn da eske saldy.

Fraksıa depýtattary olar buryn kótergen ózge de máseleler Prezıdent Joldaýynda oryn alǵanyn, mysaly, 2017 jyldan beri sheneýnikterdiń shtatyn qysqartý, ákimder saılaýy týraly tapsyrmalar partıanyń baǵdarlamalyq mindetteriniń biri ekenin eske saldy.

Talqylaýǵa qatysýshylar Prezıdent Joldaýyn qoldap, «Aq jol» QDP parlamenttik fraksıasyna Joldaýdy iske asyrý úshin tapsyrmalardy belgiledi.