2020 jylǵy 3 qyrkúıekte Nú-Iorktiń ońtústik okrýgtik soty sot óndirisiniń tártibin buzǵany úshin Ilás pen Vıktor Hrapýnovtarǵa qarsy aıyppul salý týraly kezekti qaýly shyǵardy. Bul týraly ádilet mınıstrliginiń resmı saıy habarlady.

Sýdıa Ketrın Parker Hrapýnovtar kóptegen zańdy mindettemelerdi buzǵan, dáleldemelerdi ádeıi joıǵan jáne keıbir dáleldemelerdiń óz qoldarynda joqtyǵy týraly jalǵan jaýap bergen degen qorytyndyǵa keldi.

Sondaı-aq sot Hrapýnovtardyń osy is boıynsha keıbir sot qaýlylaryn, sonyń ishinde Ilás Hrapýnovtyń qupıa aıǵaqtardy ruqsatsyz taratýǵa salynǵan tyıymdy buzǵandyǵyn anyqtady.

3 qyrkúıektegi sheshim sottardyń Hrapýnovtar men Ablázovqa qatysty quqyqqa qaıshy minez-qulqy jáne sot óndirisiniń tártibin buzǵany úshin aıyppuldar taǵaıyndaý týraly ústimizdegi jylǵy mamyr aıynda jáne 2019 jylǵy shilde aıynda shyǵarylǵan qaýlylary qatarynyń jalǵasy bolyp tabylady. Bul qatarynan sanaǵanda besinshi sheshim.

Aıyppuldyń naqty mólsheri talapkerlerdiń ózderi jumsaǵan sot shyǵyndarynyń somasyn sotqa usynǵannan keıin belgilenedi.

Qazaqstan Respýblıkasy ádilet mınıstrligi (Almaty q. ákimdiginiń atynan) "BTA Bank" AQ-men (budan ári - Talapkerler) birlesip, tórt jyldan astam ýaqyt buryn Ablázovty, Hrapýnovtardy jáne olardyń qylmystyq sybaılastaryn Qazaqstannan urlanǵan aqshany AQSH-ta jaratty degen aıyppen Nú-Iorktaǵy "Flatotel" sot qaraýyna bastamashylyq jasaǵan.

Ablázov jalǵan nesıeler berý arqyly BTA-dan mıllıardtaǵan dollar urlaǵan. Ol úshin Ablázov Qazaqstanda sottalyp, Birikken Koróldik sottarynda kináli dep tanylǵan. AQSH-taǵy sot qaraýlary barysynda talapkerler Ablázovtyń qylmystaryn rastaıtyn qosymsha eleýli dáleldemelerdi jınady, sondaı-aq osy qylmystardyń jasalýyn óz kózimen kórgen kóptegen kýálardyń jaýaptaryn qamtamasyz etti.

QR úkimetiniń konsýltanty – "Boies Schiller Flexner LLP" seriktesi Mettú Shvars:

"Talapkerler usynylyp jatqan dáleldemelerge sottyń jiti qaraýyn joǵary baǵalaıdy. Ablázov, Hrapýnovtar jáne olardyń sybaılastary sot prosesinde adal nıetpen qatysýdan birneshe ret bas tartyp, kóptegen sot qaýlylaryn buzǵan. Dáleldemelerdiń bir bóligin qasaqana joıǵandyqtaryna qaramastan, olardyń jasalǵan qylmystarǵa qatystylyǵyn rastaıtyn qujattardyń kólemi jetkilikti. Talapkerler sol dáleldemelerdi Nú-Iork alqabıler sotynyń nazaryna usyný múmkindigin asyǵa kútýde" degen málimdeme jasady.