Almatyda monıtorıń Ortalyǵy bir aı ishinde qaýipti toptaǵy 1 200-den astam naýqasqa keńes berdi. Bul týraly óńirlik komýnıkasıalar qyzmeti alańynda ótken brıfıń barysynda, Almaty qalasy Densaýlyq saqtaý Basqarmasynyń basshysy Kamaljan Nadyrov málimdedi.

Spıker epıdemıologıalyq ahýaldyń qandaı ekenin jáne Almatydaǵy covid-19 aýrýymen syrqattaný, naýqastardy basqarý modeli týraly egjeı-tegjeıli aıtyp berdi.

«Biz rezervtik tósek sanyn arttyrýdy jalǵastyramyz. Jańa, tez salynatyn modýldik aýrýhananyń qurylysy qarqyndy júrip jatyr. Bul 300 tósek-orynǵa arnalǵan ekinshi modýldik ınfeksıalyq stasıonar bolady. Onyń ishinde 30 – reanımasıalyq oryn bar. Sonymen qatar stasıonardy birinshi eshelonnyń tolyqqandy klınıkasy retinde medısınalyq tehnıkamen jabdyqtaý jáne qajetti kadrlarmen tolyqtyrý máselesi pysyqtalýda», — dedi Basqarma basshysy.

1 qazanǵa deıin, qonaq úı bazasynda 215 tósek- oryndy, onyń ishinde 34 reanımasıalyq oryny bar eki kovıd stasıonary iske qosylady dep josparlanýda. Ol stasıonarlar barlyq standarttarǵa sáıkes qaıta qurylady. Stasıonarlarda baqylaý jáne suryptaý bokstary, operasıalyq jáne emhanalyq bólimsheler bar.

Barlyq ǵımarat jeke kirý esikteri, zalalsyzdandyrý júıeleri bar úsh bólikke bólinedi. Klınıkalarda taza aýa aǵyndar júıesi bar. Bul medısınalyq qyzmetkerlerdiń vırýs juqtyrý qaýpin azaıtýǵa múmkindik beredi.

Alǵashqy medısınalyq-sanıtarlyq kómek (AMSK) deńgeıinde emhanaǵa KVI jáne pnevmonıamen aýrýlarymen keletinder sany 36%-ǵa azaıdy.

«Syrqattanýdyń tómendeýine qaramastan, MSAK deńgeıinde 74 medısınalyq uıym, 39 memlekettik emhana jáne 35 jeke menshik medısınalyq mekemeniń jumysyn arttyrýdy jalǵastyramyz. MSAK medısınalyq uıymdarynda 9914 medısına qyzmetkeri, onyń ishinde 2712 dáriger qyzmet etti. MSAK uıymdaryna tirkelgenderdiń sany 2035 myń adamdy quraıdy. Onyń ishinde 1695 myń adam memlekettik emhanalarǵa tirkelgen», — dedi Qoǵamdyq densaýlyq Basqarmasynyń basshysy.

Sonymen qatar, emhana jumysy mobıldi brıgadalardy arttyrý arqyly kúsheıtildi. Mobıldi brıgadanyń sany 5 esege artyp, 407 brıgadany quraıdy. Bul degenimiz 925 medısına qyzmetkeri jumys istep jatyr degendi bildiredi.

Monıtorıń Ortalyǵynyń alǵashqy aıdaǵy qorytyndysy boıynsha, qaýipti toptaǵy 1200 naýqasqa keńes berilgen.

«Emhanada epıdemıa bastalǵannan beri onlaın- keńes qyzmeti artty. Al qatań karantın kezinde 80%-ǵa deıin jetti», — dedi Kamaljan Nadyrov.

Telemedısınanyń arqasynda naýqastyń emhanaǵa dáriger qabyldaýyna kelýin qashyqtan emdeýge aýystyra aldyq. Osylaısha naýqastar ózderiniń ýchaskelik dárigeriniń baqylaýynda boldy. 272 940 naýqas 10 mlrd 831 mln tg quraıtyn 1036 myń medısınalyq preparattarmen qamtamasyz etildi. Kóp naýqasqa dáriler úıine jetkizip berildi».