Konstıtýsıa memlekettik bılik pen memlekettik basqarý júıesin jan-jaqty nyǵaıtty. El ekonomıkasyn túbegeıli reformalaý men ony tereń daǵdarystan shyǵarýdyń máselelerin sheshti. Bul týraly L.N. Gýmılev atyndaǵy Eýrazıa  ulttyq ýnıversıtetiniń zań fakúlteti dekanynyń ǵylym jónindegi orynbasary PhD doktory Qanat Ábdilov tildesý barysynda aıtty.

Onyń aıtýynsha, Ata Zań elimizdiń syndarly syrtqy saıasat júrgizýine yqpal jasap, ishki saıası turaqtylyqty qamtamasyz etti. 

"Órkenıetti álemde azamattardyń jalpyǵa tanylǵan quqyqtary men bostandyqtaryn ornyqtyryp, demokratıalyq ınstıtýttardy damytty. Sonymen, Konstıtýsıamyz tıimdi memlekettik quqyqtyq júıemizdiń ornyǵýyna, naryqtyq ekonomıkamyzdyń qalyptasýyna, halqymyzdyń ál-aýqatyn kóterýge, Qazaqstanymyzdyń saıası, ekonomıkalyq, áleýmettik damýynyń bastaýy boldy. Konstıtýsıalyq prınsıpter elimizde demokratıalyq jáne saıası júıeniń qalyptasýyna, adam quqyǵy men bostandyǵynyń qorǵalýyna kepildik berdi. Konstıtýsıamyz - qazaqstandyqtardyń boıynda azamattyq jáne qazaqstandyq patrıotızm sezimderin tárbıeleýde, halyqtyń ıdeıalyq-mádenı damýynyń negizin quraýshy, qoǵamdyq saıası úrdisterge árbir adamnyń qatystylyǵyn pash etetin úlken saıası jáne quqyqtyq qujat. Táýelsizdigimizdiń tuǵyryn nyǵaıtyp, eldigimizdiń eńseli bolýyn zańdyq turǵydan qamtamasyz etetin basty qujattyń qabyldanýynyń bul belesi rýhanı toptasýymyzǵa, alǵy kúnderge senimmen umtylýymyzǵa da jiger bere túsetini sózsiz",-deıdi PhD doktory. 

Konstıtýsıa kúni - bizdiń memleketimizdiń, halqymyzdyń eń negizgi merekeleriniń biri. Ǵasyrlar toǵysynda álemdik órkenıettiń shyńyna umtylǵan Qazaqstan halqy tarıhy da taǵdyrly sheshim qabyldap, jasampaz jańa dáýirge qadam basty. Ata Zań bizdiń búkil jarqyn isterimizdiń qaınar bastaýyna aınaldy. 

"Konstıtýsıa myzǵymas memleketimizdiń altyn qazyǵy, birligi men yntymaǵy jarasqan eldigimizdiń buljymas baǵdary, kemel keleshegimizdiń kepili! Konstıtýsıany basshylyqqa ala otyryp, biz táýelsizdigimiz ben memleketimizdi nyǵaıtý jolynda ǵasyrlyq máni bar aýqymdy atqardyq. Biz az ǵana 20 jyl ishinde dáýleti tasyǵan qýatty da áleýmetti elge aınaldyq. Keń baıtaq jerimizdiń shekarasyn shegelep, irgemizdi myzǵymastaı etip bekittik. Taǵdyr toǵystyrǵan, tarıh tabystyrǵan túrli ult ókilderi Konstıtýsıa qaǵıdattary tóńiregine toptasty. Eýrazıanyń júregine ornalasqan elordamyz álemge rýhanıattyń iri ortalyǵy, saıasattyń irgeli ordasy retinde tanyldy",-deıdi ol. 

Sonymen qatar, ol elimizdiń árbir azamaty ózin teń sezinetin, tatýlyǵy jarasqan Qazaq eliniń, Qazaqstan halqynyń qarymdy isteri búginde álem jurtshylyǵy úshin úlgi-ónegege aınalǵanyn jetkizdi. 

"Munyń ózi bizdiń Ata Zańymyzda búkil - adamzattyq qundylyqtar men órkenıettik ıgilikterdiń barlyǵy qamtylǵanyn aıǵaqtaıdy. Konstıtýsıa kúniniń eldik pen egemendiktiń, irgesi berik memlekettiliktiń temir qazyǵyna aınalǵan ásem Astanamyzdyń tórinde toılanýynyń da ózindik máni zor. Qazaq memleketiniń ósip-órkendep nyǵaıýyna, damýyna negiz bolǵan Ata Zańymyz – qazaq eliniń máńgilik el ekendigin dáleldeıdi. Konstıtýsıa elimizdiń - máńgilik zańy ekeńdigin qazaq eli moıyndaıdy. Óz Otanyn súıip, maqtan tutyp, onyń zańdaryna baǵynýy - árbir Qazaqstan azamatynyń eliniń aldyndaǵy azamattyq boryshyn oryndaýy. Konstıtýsıa zańdarymen ómir súrý - qazaq eliniń jarqyn bolashaǵy. Konstıtýsıa - Qazaqstannyń turaqtylyǵy men órkendeýiniń negizi",-deıdi Q. Ábdilov.

Sondaı-aq, ol elimizde kezeń-kezeńmen ótkizilgen konstıtýsıalyq qaıta qurýlar memlekettik qurylymnyń tıimdi damýyna, demokratıalyq qaǵıdalarǵa súıenip azamattyq qoǵamnyń múddelerin qamtamasyz etetinin aıtty. 

"Qazirgi qazaqstandyq júıe bıliktiń qoǵam aldyndaǵy jaýapkershiligin qamtamasyz etýge baǵyttalǵan. Jalpy, konstıtýsıalyq reforma Qazaqstandy shynaıy demokratıalandyrýǵa qaraı jasalǵan naqty qadamdardyń biri boldy dep nyq senimmen aıta alamyz",-dedi ol.