Bilim jáne ǵylym mınıstri Asqat Aımaǵambetov áleýmettik jelidegi paraqshasynda bilim berý baǵdarlamalary týraly jazba jarıalady.
"Biraz ýaqyt pedagogıkalyq mamandyqtar boıynsha grant jeńip, oqýǵa túsken túlekterdiń ortasha baly 60-65 bolatyn. Bul rette eń tómengi shekti baldyń 50 bolǵanyn eskerý qajet.
Oǵan qosa, pedagogıkalyq mamandyqty tańdaǵandardyń arasynda mektepti úzdik bitirgender nemese «Altyn belgi» ıegerleri az boldy. Sonymen qatar jyl saıyn JOO bitiretin 40 myńnan astam túlektiń tórtten biri ǵana bilim berý mekemelerine mamandyq boıynsha jumysqa ornalasatyn.
Shyntýaıtyn aıtqanda, jas muǵalimderdiń biliktilik deńgeıiniń tómendigi ýnıversıtterdegi bilimniń sapasyzdyǵyna ǵana emes, sonymen qatar muǵalimdik qyzmet tartymdylyǵynyń tómendigine de baılanysty. Árıne, bul aýqamdy másele keshendi túrde sheshilýi tıis. Atalǵan baǵyt boıynsha jumys júrgizilip jatyr
Qazirgi ýaqytta bilim berý baǵdarlamalaryn jańartyp, pedagogıkalyq praktıkany uıymdastyrýdyń jańa júıesin, dýaldy oqytý júıesin engizip jatyrmyz. Budan bólek muǵalim bolyp jumys isteýge kirisetin túlekterdiń daıyndyq deńgeıin anyqtaıtyn arnaıy emtıhan da jetildirilip jatyr.
Sonymen qatar 2020 jyly pedagogıkalyq mamandyqtarǵa túsý úshin eń tómengi shekti bal 70-ke deıin kóterildi. Bıyl memlekettik tapsyrys boıynsha bolashaq muǵalimderdi daıyndaıtyn JOO-ǵa qoıylatyn talaptardy da kúsheıttik. Buǵan deıin olardyń sany 86 bolsa, endi kúrt azaıyp keledi. Biz úshin basty qaǵıda – san emes, sapa jáne tıisti jaǵdaılardyń jasalýy.
Biraq biz talaptardy kúsheıtip qana qoımaı, yntalandyrý úshin de jaǵdaı jasap jatyrmyz.
Prezıdenttiń tapsyrmasy boıynsha 2020 jyldyń qyrkúıeginen bastap bolashaq pedagogterdiń stıpendıasy 42 000 teńgege deıin ósti. Salystyrmaly túrde alsaq, basqa mamandyqtar boıynsha oqıtyn stýdentterdiń stıpendıasy 26 myń teńgeni quraıdy.
Budan bólek muǵalimderdiń jalaqysy qazirdiń ózinde ulǵaıtyldy jáne ol jyl saıyn 25% - ǵa ósip otyrady. Sondaı-aq pedagogterdi mindetine jatpaıtyn jumysqa tartýdy boldyrmaý jáne artyq eseptilikten aryltý boıynsha sharalar qabyldanyp jatyr.
Memlekettik tapsyrysty ornalastyrý jáne túlekterdi maqsatty daıarlaý arqyly granttardy bólý júıesi de ózgerip jatyr.
2021 jyldan bastap barlyq túlek sertıfıkattaý rásiminen ótýi kerek. Jumysqa ornalasý kezinde básekelestik bolýy úshin konkýrs negizinde qabyldaý júıesi engizilip jatyr.
Biraq eń mańyzdy shara «Pedagog mártebesi týraly» Zańnyń qabyldanýy boldy.
Mine, osynyń nátıjesinde biz sońǵy jyly daryndy jastardyń pedagog mamandyǵyna degen qyzyǵýshylyǵynyń aıtarlyqtaı artqanyn baıqadyq.
Máselen, bıyl shekti bal kóterildi. Konkýrs nátıjesine sáıkes grant 8506 túlekke taǵaıyndaldy.
Oqýǵa túsýshiler arasynda «Altyn belgi» ıegerleriniń qatary da kóbeıgen – 1565 adam (grantqa ıe bolǵandardyń jalpy sanynyń shamamen 20%-y), bul ótken jylǵy kórsetkishpen salystyrǵanda 1,7 ese kóp. Jalpy pedagogıkalyq mamandyqtar boıynsha ortasha upaı aıtarlyqtaı ósti.
Bıyl «Shetel tili muǵalimderin daıarlaý» (shekti bal – 104), «Matematıka muǵalimderin daıarlaý» (shekti bal – 111), «Qazaq tili men ádebıeti muǵalimderin daıarlaý» (shekti bal – 107), «Pedagogıka jáne psıhologıa» (shekti bal – 97), «Arnaıy pedagogıka boıynsha mamandardy daıarlaý» (shekti bal – 89) jáne t.b. baǵyttar boıynsha úlken konkýrs boldy.
Biz, árıne, jalaqyny kóterý jáne basqa da áleýmettik kepildikter mindetti túrde pedagogterge qoıylatyn talaptardy arttyrýmen de saı kelýi tıis ekenin túsinemiz.
Ókinishtisi, basqa salalardaǵydaı jumysyna nemquraıly qaraıtyn muǵalimder de kezdesedi. Ondaı mamandardyń ornyna qyzmetine jaýapty qaraıtyn áriptesterimiz keletin bolady.
Memleket basshysy Qasym-Jomart Kemeluly óziniń Joldaýynda HHİ ǵasyrdyń urpaǵy tereń bilimdi bolýy kerektigin, al árbir istiń negizinde kásibılik bolý shart ekenin atap ótti.
UBT qortyndysynyń jaqsy jańalyǵy – bul pedagog mamandyǵynyń túlekter arasynda, ásirese myqty talapkerlerdiń suranysyna ıe bolýy. Bul – eńbektiń zaıa ketpegeniniń dáleli.
Jańa Zań qazirdiń ózinde alǵashqy jemisin berip jatyr, qatarymyzǵa áriptes retinde myqty tulǵalardyń keletinine senimdimin" delingen mınıstrdiń áleýmettik jelidegi jazbasynda.
