Prezıdent Qasym-Jomart Toqaev elde eki jańa vedomstvo qurý jónindegi jarlyqqa qol qoıdy, dep habarlaıdy Aqorda.

"Qazaqstan Respýblıkasy Konstıtýsıasynyń 44-babynyń 5) tarmaqshasyna sáıkes memlekettik basqarý júıesin jańǵyrtý jáne onyń tıimdiligin arttyrý maqsatynda QAÝLY ETEMİN:    

1. Mynalar:       

1) Qazaqstan Respýblıkasynyń Strategıalyq josparlaý jáne reformalar agenttigi qurylsyn, oǵan strategıalyq josparlaý jáne memlekettik statısıkalyq qyzmet salalaryndaǵy Qazaqstan Respýblıkasy Ulttyq ekonomıka  mınıstrliginiń  fýnksıalary men ókilettikteri berile otyryp, mynadaı: 

reformalardy júzege asyrý tásilderin, reformalardy júzege asyrýǵa qajetti, sondaı-aq olardyń iske asyrylý barysyn monıtorıńteý men baǵalaý  boıynsha normatıvtik quqyqtyq aktiler jobalaryn ázirleý;

Memlekettik josparlaý júıesiniń qujattaryn daıyndaý kezinde, sondaı-aq olardy kelisý, iske asyrý barysyn monıtorıńteý men baǵalaý boıynsha memlekettik organdardyń jáne kvazımemlekettik sektor sýbektileriniń qyzmetin úılestirý;

Memlekettik organdardyń memlekettik basqarý júıesin jetildirýge baǵyttalǵan usynystaryn kelisý;

Eldiń damýy men halyqaralyq ahýaldy strategıalyq boljamdaý men  taldaý júrgizý;

Vedimistik statısıka salasyndaǵy jumysty  úılestirý;

Ortalyq memlekettik organdar jáne oblystardyń, respýblıkalyq mańyzy bar qalalardyń, astananyń jergilikti atqarýshy organdary qyzmetiniń tıimdiligine jyl saıynǵy baǵalaý júrgizý boıynsha jumystardy úılestirý jónindegi fýnksıalar men ókilettikter berilsin;

2) Qazaqstan Respýblıkasynyń  Básekelestikti qorǵaý jáne damytý agenttigi qurylsyn, oǵan tıisti taýar naryqtarynda básekelestikti qorǵaý jáne monopolısik qyzmetti shekteý, memlekettik monopolıa salasyna jatqyzylǵan qyzmetti baqylaý men retteý salasyndaǵy Qazaqstan Respýblıkasy Ulttyq ekonomıka mınıstrliginiń  fýnksıalary men ókilettikteri berilsin.

2. Qazaqstan Respýblıkasynyń Úkimeti:

1) Qazaqstan Respýblıkasy Prezıdentiniń Ákimshiligimen kelisý boıynsha memlekettik organdar men olarǵa vedimistik baǵynysty uıymdardyń shtat sanyn qaıta bólýdi;

2) Qazaqstan Respýblıkasy Ulttyq ekonomıka mınıstrliginiń Statısıka komıtetin tıisti shtat sanymen birge Qazaqstan Respýblıkasynyń Strategıalyq josparlaý jáne reformalar agenttiginiń qaraýyna berip, ony keıinnen Ulttyq statısıka búrosy etip qaıta qurýdy;

3) osy Jarlyqty iske asyrý boıynsha ózge de sharalardy qabyldaýdy qamtamasyz etsin.

3. Qazaqstan Respýblıkasynyń Strategıalyq josparlaý jáne reformalar agenttigi men Qazaqstan Respýblıkasynyń Básekelestikti qorǵaý jáne damytý agenttigi beriletin fýnksıalar men ókilettikter sheginde Qazaqstan Respýblıkasy Ulttyq ekonomıka mınıstrliginiń quqyqtary men mindettemeleriniń quqyqtyq mırasqorlary bolyp aıqyndalsyn.

4. "Qazaqstan Respýblıkasy Prezıdentiniń Ákimshiligi týraly erejeni bekitý  týraly" Qazaqstan Respýblıkasy Prezıdentiniń 2008 jylǵy
11 naýryzdaǵy № 552 Jarlyǵyna (Qazaqstan Respýblıkasynyń PÚAJ-y, 2008 j., № 12-13, 116-qujat) mynadaı tolyqtyrý engizilsin:

joǵaryda atalǵan Jarlyqpen bekitilgen Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdardyń tizbesi:

mynadaı mazmundaǵy joldarmen tolyqtyrylsyn:

"Qazaqstan Respýblıkasynyń Strategıalyq josparlaý jáne reformalar agenttigi";

"Qazaqstan Respýblıkasynyń Básekelestikti qorǵaý jáne damytý agenttigi".

5. Qazaqstan Respýblıkasy Prezıdentiniń Ákimshiligi bir aı merzimde:

1) Qazaqstan Respýblıkasy Prezıdentiniń qaraýyna:

qurylǵan Qazaqstan Respýblıkasynyń Strategıalyq josparlaý jáne reformalar men  Qazaqstan  Respýblıkasynyń  Básekelestikti qorǵaý jáne damytý agenttikteriniń tóraǵalarymen birlesip, qurylǵan agenttikter men olardyń qurylymdary týraly erejelerdiń jobalaryn;

Qazaqstan  Respýblıkasynyń  Úkimetimen  birlesip, qaıta  uıymdastyrylatyn  memlekettik  organdardan shtat sanyn qurylǵan agenttikterge qaıta bólý, sondaı-aq olardyń qyzmetkerleriniń eńbegine aqy tóleý júıesi jóninde usynystar engizsin;

2) osy Jarlyqty iske asyrý boıynsha ózge de sharalardy qabyldasyn.

6. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

7. Osy Jarlyq qol qoıylǵan kúninen bastap qoldanysqa engiziledi" delingen resmı saıt jarıalaǵan jarlyqta.