Elbasy Nursultan Nazarbaevtyń tóraǵalyǵymen qaýipsizdik keńesiniń otyrysy ótti. Bul týraly elbasy.kz habarlady.

Kezdesýde halyqtyń densaýlyǵy men ekonomıkalyq qaýipsizdigin qamtamasyz etý máseleleri qaraldy.

Eń aldymen qaýipsizdik keńesiniń tóraǵasy dárigerlerdiń, polısıa qyzmetkerleriniń, áskerı qyzmetkerlerdiń jáne koronavırýs ınfeksıasymen kúresýge úles qosqan basqa da sala ókilderiniń janqıarlyq eńbegin atap ótti.

Kezdesý barysynda densaýlyq saqtaý mınıstri A.Soı qazirgi epıdemıologıalyq qaýip-qaterlerge daıyndyq týraly baıandama jasady. Sonymen qatar, qaýipsizdik keńesiniń músheleri ulttyq ekonomıka mınıstri R.Dálenovtiń áleýmettik-ekonomıkalyq damýdyń qazirgi táýekelderi men olardy aldyn alý sharalary týraly, sondaı-aq bilim jáne ǵylym mınıstri A.Aımaǵambetovtiń bilim berý prosesiniń turaqtylyǵyn qamtamasyz etý máseleleri týraly esepterin tyńdady.

Nursultan Nazarbaev jahandyq pandemıanyń "ekinshi tolqynyna" resýrstardy daıyndaý, aldyn-alýdyń keshendi sharalaryn ázirleý qajettigin, sondaı-aq syrqattaný deńgeıin shynaıy baǵalaý men boljaýdyń mańyzdylyǵyn atap ótti.

– Daǵdarystan keıingi kezeńdegi damý boljamyn, qaýip-qaterler men múmkindikterdiń tujyrymdamalyq josparyn ázirleý qajet. Daǵdarystan keıingi kezeńdegi damý josparyn búgingi jaǵdaılardy eskere otyryp, taǵy da pysyqtaý kerek. Biz pandemıamen kúrestiń eń qıyn senarıine jáne onymen baılanysty qaýip-qaterlerge daıyn bolýymyz kerek, – dedi N. Nazarbaev.

Sonymen birge, kezdesý barysynda quqyq qorǵaý organdaryna qylmystyq ahýaldyń nasharlaýyna jáne qylmystyń ósýine jol bermeý, sondaı-aq aldyn alý sharalaryn ázirleý tapsyryldy.

– Halyqty azyq-túlikpen jáne dári-dármektermen úzdiksiz qamtamasyz etý, áleýmettik mańyzy bar taýarlardyń baǵasy men tarıfterdi negizsiz ósirýge jol bermeý úshin tıisti sharalar qabyldaý mańyzdy. Sondaı-aq, jylytý maýsymyna sapaly daıyndyq jasap, basqa da ózekti strategıalyq máselelerge kóńil bólý kerek, – dep qorytyndylady qaýipsizdik keńesiniń tóraǵasy.