Qazaqstannyń bilim jáne ǵylym mınıstri Asqat Aımaǵambetov mınıstrliktiń aparattyq otyrysynda JOO ustazdary qajetsiz jumystardyń bárinen bosap, óz mindetimen aınalysýy kerektigin málimdedi. 

– Qazirgi ýaqytta biz akademıalyq jáne basqarýshy quzyretterdiń bárin ýnıversıtetterge berip jatyrmyz. Sonyń sheńberinde mınıstrlik rettep otyrǵan ártúrli qujattyń bárin alyp tastadyq. 2 qyrkúıek kúni buıryqqa qol qoıyp, ony Ádilet mınıstrligine tirkedik. Endi osy buıryqtyń sheńberinde jumys isteý kerek. Bilim jáne ǵylym mınıstrligi ýnıversıtetterden eshqandaı qujattardy talap etpeıdi.

Moıyndaý kerek qazir mıǵa syımaıtyn esep túrleri bar. Kásipti aıqyndaý jýrnaly, jumysqa ornalasqany týraly anyqtama talap etiledi. JOO-lardyń bári demeımin, biraq birazy áli kúnge deıin osy anyqtamany talap etip júr. Onyń ne keregi bar? Bilim jáne ǵylym mınıstrligine ol qujat múlde kerek emes. Jumysqa ornalasý kórsetkishin biz basqa memlekettik organdardyń elektrondy bazasynan ala salamyz. Málimetter jetedi. Tipti pedagogtarǵa oıǵa syımaıtyn talapty qoıatyndar bar. Ásirese jazda keıbir JOO-lardaǵy pedagogtardyń jumysy qanshama abıtýrıentti oqý ornyna tarta alatynyna baılanysty baǵalanady. Bul tipti nonsens. Shyn máninde pedagog óz isimen aınalysýy kerek, – dedi mınıstr.