«Nur Otan» partıasynyń Ortalyq apparaty Nur-Sultan qalasynda jańa múshelerdi qabyldaý kezinde bolǵan olqylyqtardy anyqtady. Bul týraly Partıalyq baqylaý komıtetiniń otyrysy barysynda belgili boldy. 

Elbasy, Partıa Lıderi Nursultan Nazarbaevtyń partıaishilik saılaýda ashyq, anyq jáne ádil daýys berýdi qamtamasyz etý qajettigi týraly tapsyrmasyn oryndaý aıasynda «Nur Otan» Ortalyq apparaty partıanyń jańadan qabyldanǵan músheleri men «Praımerız» aqparattyq júıesinde tirkeýden ótkenderge taldaý júrgizedi.

Osylaısha, kezekti tekserý barysynda elordada «Azıa Ortalyq Snab» JSHS bastaýysh partıa uıymy qabyldaǵan 2466 jańa partıa múshesiniń eseptik málimetteri rastalmady. Osy oraıda, 11 qyrkúıekten 4 qazanǵa deıin partıaǵa qabyldaýdyń toqtatylýyna qaramastan, 12-17 qyrkúıek aralyǵynda munyń ary qaraı da júzege asyrylǵany anyqtaldy.

– Bul óreskel tártip buzýshylyqtar. Bizge partıada jeke «qajetti» kandıdattar úshin daýys berýdi uıymdastyrýǵa arnalǵan ózderiniń bir sáttik máselelerin sheshetinder, jáı ǵana qara kóbeıtetinder qajet emes. Sondyqtan daýys berý kezinde yqtımal burmalaýlardy boldyrmaý úshin praımerız kezeńinde partıaǵa qabyldaý toqtatyldy. Osy faktilerdi eskere otyryp, partıanyń astanalyq fılıaly «Azıa Sentr Snab» JSHS BPU-daǵy barlyq partıa músheleriniń derekterin salystyryp, tekserýi tıis, – dep málimdedi Partıalyq baqylaý komıtetiniń tóraǵasy Pavel Kazansev.

Baspasóz qyzmetiniń málimetinshe, Partıalyq baqylaý komıtetiniń tekserýi barysynda partıa múshelerin bir telefon nómirimen tirkeý derekteri anyqtaldy.

Mysaly, Aqmola oblysynyń Býrabaı aýdanynda «Bilim Býrabaı» jáne «Birlik Býrabaı» BPU-da partıanyń 105 múshesiniń bir telefon nómiri bar. Al Qaraǵandy oblysynyń Balqash qalasynda «Ardager», «Gúlder», «Balqash stansıasy» jáne «Shıpager» BPU-da bir telefon nómiriniń ıeleri 279 adam boldy.

Otyrys qorytyndysy boıynsha aımaqtyq jáne aýmaqtyq partıalyq baqylaý komısıalaryna barlyq aıqyndalǵan faktilerdi anyqtap, kinálilerdi jazalaý tapsyryldy.

Eske sala keteıik, buǵan deıin partıa Tóraǵasynyń birinshi orynbasary Baýyrjan Baıbek praımerızde onlaın-daýys berýdiń ashyqtyǵyn qamtamasyz etý úshin arnaıy rastaý (verıfıkasıa) júıesi (ınternet-bankıng úlgisi boıynsha jeke tulǵany anyqtaý) qoldanylatynyn aıtqan bolatyn.

Júıe qaǵıdaty: «Bir daýys, bir JSN, bir mobıldi nómir jáne bir IP-mekenjaı». Iaǵnı, eshkim eki ret kire almaıdy jáne tıisinshe, basqa adamǵa daýys bere almaıdy. Munyń bári ár túrli burmalaýshylyqtardy, aıla-sharǵyny, sondaı-aq, jappaı daýys berýge májbúrleýdi boldyrmaý úshin istelip otyr.

Partıanyń baspasóz qyzmeti barlyq tártip buzýshylyq derekteri boıynsha 8 (800) 080 4441 «jedel jelige» (qońyraý shalý tegin) nemese  komek@nurotan.kz elektrondyq poshtaǵa  habarlasýǵa bolatynyn atap ótti.