Ispanıa úkimeti Madrıd bıligin qalada koronavırýs boıynsha shekteýlerdi qatańdatýǵa shaqyrdy. Ispan bıliginiń málimetinshe, qatań shekteýlersiz turǵyndar úshin "úlken qaýip" týyndaıdy.

Madrıd juma kúni Covid-19 taralýy aýyr aımaqtardaǵy shekteýlerdi uzartty, biraq búkil qalany lokdaýnǵa alýdan bas tartty.

Senbide Ispanıanyń densaýlyq saqtaý mınıstri Salvador Illa qazirgi shekteýler jetkiliksiz bolǵanyn aıtty.

Ol pandemıany baqylaýǵa alý úshin "bel sheshe qımyldaıtyn ýaqyt keldi" dedi.

"Turǵyndar úshin, kórshiles aımaqtar úshin úlken qaýip bar" degen mınıstr azamattardyń densaýlyǵyn birinshi orynǵa qoıýǵa jáne búkil qalany ishinara buǵattaýǵa shaqyrdy.

Ispanıanyń aımaqtary densaýlyq saqtaý salasyna jaýapty, sondyqtan ortalyq úkimettiń ózi qalaǵan shekteýlerdi qoıýǵa quqyǵy joq.

Madrıd taǵy da Ispanıanyń koronavırýs epıdemıasynyń epısentrinde, qala osy jyldyń alǵashqy shyńynda bolǵan edi. Elde juma kúni taǵy 12 272 jaǵdaı tirkelip, olardyń jalpy sany 716 481-ge jetti, bul – Batys Eýropadaǵy ınfeksıanyń eń joǵary kórsetkishi.

Ispanıada jáne soltústik jarty shardaǵy kóptegen basqa elderde sońǵy aptalarda koronavırýs pandemıasyneyń ekinshi tolqyny baıqaldy.

Dúnıejúzilik densaýlyq saqtaý uıymy (DDU) qystyń jaqyndaýyna baılanysty Eýropada jáne basqa jerlerde vırýstyń qaıta jandanýy týraly qatań eskertý jasady.