Elde kavasakı sındromyna uqsas aýrý boıynsha 39 jaǵdaı tirkeldi. Bul týraly "Pedıatrıa jáne balalar hırýrgıasy ǵylymı ortalyǵynyń basqarma tóraıymy Rıza Boranbaeva málimdedi.

– Naýryz aıynan bastap jalpy respýblıka boıynsha koronavırýs ınfeksıasymen 2,5 myń bala aýyrdy. Qazirgi ýaqytta jaǵdaı turaqtaldy. Sondaı-aq koronavırýs ınfeksıasynan keıin balalarda paıda bolatyn kavasakı sındromy boıynsha da jaǵdaı turaqtaldy. Búginde osy sındromǵa uqsas aýrýmen 39 bala aýyrady.  Onyń ishinde 60%-y aýrýdan saýyǵyp shyqsa, al 40%-y qajetti em sharalaryn jalǵastyrýda, – deıdi Rıza Boranbaeva.

Kavasakı sındromy anyqtalǵan ár balada COVID-19 aýrýynyń da belgileri bolady. Klınıkalyq kórinisteri: temperatýranyń 38 gradýstan joǵarylaýy, 24 saǵat nemese odan da kóp ýaqytqa sozylýy, parasetamol, ıbýprofen sıaqty antıpıretıkterge nashar tómendeýi. Sondaı-aq, birqatar klınıkalyq belgiler paıda bolady, mysaly: deneniń bórtpesi, ishtiń aýyrýy, dıareıa, tynys alý júıesiniń zaqymdanýy, jótel, tynys alý jetkiliksizdigi, tynys alý, júrek aýrýy, konúnktıvıt, alaqan men aıaqtyń isinýi.

Onyń aıtýynsha, qaýipti aýrýdy úıde emdeýdiń qajeti joq, óıtkeni bul qıyndyq týǵyzady, tipti keıde reanımasıalyq kómek qajet bolýy múmkin. Sondyqtan eger mundaı belgiler baıqalsa, jergilikti dárigerdiń kómegine júginý qajet.

Bul sındromnyń naǵyz kavasakı aýrýynan aıyrmashylyǵy barlyq jastaǵy balalarǵa, sonyń ishinde jasóspirimderge, 21 jasqa deıingi jastarǵa áser etedi.

Aýrýdyń aldyn-alý úshin, tómendegi keńesterdi eskergen abzal:

• Epıdemıaǵa qarsy barlyq sharalardy saqtaý;
• Adamdar kóp jınalatyn jerlerde maska kıý;
• Kóp adam bolýy múmkin oıyn alańdaryna, saýda ortalyqtaryna barmaý;
• Balalardyń qoldaryn durys jýýǵa, betine tıgizbeýge úıretý;
• Úıdegi oıynshyqtardyń taza bolýyn qadaǵalaý;
• Jedel-vırýstyq ınfeksıa belgileri bar adamdarmen baılanysqa túspeý;
• Jaqsy tamaqtaný jáne jetkilikti fızıkalyq belsendilikti arttyrý.

Kavasakı aýrýy – koronavırýstyq pandemıaǵa deıin bolǵan. Bul sırek kezdesetin aýrý, ıaǵnı vırýstyq ınfeksıadan keıin, genetıkalyq beıimdilikpen damıdy. Biraq bizde qazir koronavırýspen aýyratyn balalarda taza Kavasakı aýrýy emes, Kavasakıge uqsas sındrom.