Búgin, qala kúni «Qalanyń qurmetti azamaty» ataǵyn berý jáne «Eńbegi úshin» tósbelgisin tabystaý rásimi ótti.

Almaty ákimi Baqytjan Saǵyntaev óziniń Instagram paraqshasynda Qala kúni onyń qalyptasýy men ósýine aıryqsha úles qosqan qalalyqtardyń eńbegi atalyp ótedi dep jazdy.

«Belgili qoǵam men saıası qaıratkerleri, ǵylym men bilim, medısına men mádenıet, kıno men ádebıet salasynyń qyzmetkerleri qoǵamǵa qyzmet etip qana qoımaı, urpaqtar sabaqtastyǵyn qamtamasyz etip, óskeleń urpaq úshin úlgi bolýda», — dep atap ótti B. Saǵyntaev.

Megapolıstiń barlyq qoǵamdyq-saıası ómiriniń ókilderine «Qalanyń qurmetti azamaty» ataǵy berildi, sonymen qatar «Eńbegi úshin» tós belgisimen marapattaldy. Almaty ákimi qala turǵyndary atynan olardyń jumystaryna alǵys aıtyp, rızashylyq bildirdi.

«Qalanyń qurmetti azamaty» ataǵy ekonomıka ǵylymdarynyń doktory, Almaty qalasy Qoǵamdyq keńesiniń tóraǵasy R. Alshanovqa; memleket jáne qoǵam qaıratkeri, III–V shaqyrylym májilisiniń depýtaty T. Asanovqa; bilim berý isiniń qurmetti qyzmetkeri Sh. Berkimbaevaǵa; memleket jáne qoǵam qaıratkeri, Almaty qalasy ardagerler keńesiniń tóraǵasy A. Bıjanovqa; Qazaqstannyń halyq ártisi, akter jáne kınorejısser D. Jolsaqynovqa; Qazaqstannyń halyq jazýshysy Q. Jumadilovke; Eńbek sińirgen qaıratker, medısına ǵylymdarynyń doktory N. Kaıýpovaǵa; Halyq ártisi, estrada ánshisi R. Rymbaevaǵa; qalanyń bas reanımatology T. Qýandyqovqa berildi.

Qalanyń damýyna qosqan úlesi úshin «Eńbegi úshin» tósbelgisimen prodúser A. Jumash; oqytýshy Rınat Ibraımov; sáýletshi, «Eos» grekter qoǵamy keńesiniń tóraǵasy S. Kosmerıdı, Almaty qalasy PD aǵa tergeýshisi T. Kalıev, TSQQD aýdandyq basqarmasynyń epıdemıologıalyq bóliminiń bastyǵy S. Súleımenova marapattaldy.