Depýtattar qazaqstandyqtardyń nesıelerin keshirý bastamasyn taǵy da kóterdi. Másele boıynsha májilis depýtaty Azat Perýashev premer-mınıstrge, ulttyq bank jáne qarjy naryǵyn retteý jáne damytý agenttiginiń tóraǵasyna saýal joldady, dep habarlady Tengrinews.kz.

Azat Perýashev sońǵy aılarda qoǵam men májiliste kredıttik amnıstıa týraly másele kóterilip jatqanyn aıtyp, bul bastama "pandemıa kezinde halyqtyń jaǵdaıy nasharlaýy men shaǵyn jáne orta bıznestiń jappaı kúıreýin eskere otyryp, nazar aýdarýǵa laıyq" dep atap ótti.

– Tek dúnıejúzilik banktiń derekteri boıynsha bıyl kedeılik sheginen tómen ómir súrip jatqan qazaqstandyqtardyń sany bir jarym esege, ıaǵnı 800 myń adamǵa artyp, 2 mıllıon 300 myńnan asqan. Bizdiń elimizdegi árbir segizinshi azamat kedeıliktiń sheginde ómir súretini belgili boldy.

Bul munaı óndiretin memleket úshin qorqynyshty jáne jol berýge bolmaıtyn kórsetkish. Sondyqtan adamdardyń nesıelik amnıstıa jasaý týraly talaptarynyń negizi bar jáne ol bárine de túsinikti, – dedi depýtat.

Ol ótken jyly shamamen 106 mıllıard teńge somaǵa az qamtylǵandardyń banktik boryshtary keshirilgenin eske salyp, biraq máseleniń sheshilmegenin, kerisinshe ýshyǵyp ketkenin aıtty.