«Birlik» partıasynyń Nur-Sultan qalasynda kezekten tys besinshi sezin ótkizdi, dep habarlaıdy QazAqparat.

Beınekonferensıa rejıminde ótken sezge partıanyń Nur-Sultan, Almaty, Shymkent qalalary men barlyq óńirden ókilderi qatysty.

Partıanyń tóraǵasy Serik Sultanǵalıdiń aıtýynsha, sıez aıasynda delegattardyń, sondaı-aq partıanyń barlyq aımaqtardaǵy músheleriniń usynystary qabyldandy.

«Bizdiń partıamyz óz jumysyna dálelsiz ádispen nazar aýdartýdan qashanda aýlaq boldy. Jumysymyzda bireýge unaý jaǵdaıaty bolǵan emes. Bizdiń partıa – naqty ister partıasy. «Nur Otan» ishki praımerız júrgizýde, basqa partıalar da belsendilik tanytyp otyr. Ýaqyt belsendilikti talap etip otyrǵany túsinikti», - dep atap ótti sıez barysynda sóz sóılegen «Birlik» partıasynyń tóraǵasy Serik Sultanǵalı.

Sonymen birge, ol «Aýyl» partıasymen birigý máselesine qatysty túsinikteme berip ótti. Atap óte keteıik, buǵan deıin biriktirýge qatysty usynystyń qabyldanbaǵany týraly habarlanǵan.

«Eseıgen partıa retinde, barlyq saıası oqıǵalarǵa qatysýǵa kúshimiz bar jáne oǵan daıynbyz. Bizdiń partıamyzdyń qaǵıdaty – qurǵaq ýáde bermeý, ıaǵnı saılaýshylar men halyqtyń aldynda kópti ýáde etip, bos sóz aıtpaý. Mysalǵa, bir aýylǵa sý qubyryn júrgizip bersek te, bul naqty jumys bolar edi. Az bolsa da, jumys. Eger bir kópbalaly otbasyna birer keli un, káspıt aparyp, aqshalaı kómektessek – bul naqty is», - dep atap ótti S.Sultanǵalı.

Sıez barysynda partıa Jarǵysyna ózgerister engizildi.

«Birlik» saıası partıasy qoǵamdyq birlestiginiń Jarǵysy 2016 jyldyń 3 aqpanynda bekitilgen. Partıa organdarynyń sheshimderdi jedel qabyldaý jáne QR qoldanystaǵy zańnamasyna sáıkes júrgizý maqsatynda partıanyń Jarǵysyna ózgerister men tolyqtyrýlar engizý usynylyp otyr. Jarǵyǵa engiziletin negizgi jáne mańyzdy ózgerister mynalar: sheshimderdi jyldam qabyldaý maqsatynda «Partıaǵa jańa múshelerdi qabyldaý týraly sheshim shyǵarý múmkindigi» bóliminde partıa tóraǵasynyń ókildigi tolyqtyryldy, partıa seziniń quzyreti tolyqtyryldy, Jarǵy partıa seziniń otyrysyn beınekonferensıa rejıminde ótkizýge múmkindik beretin bólimmen tolyqty. Partıa seziniń sheshimderin jedel qabyldanýyn qamtamasyz etý jáne ákimshilik shyǵyndardy qysqartý maqsatynda partıa sezin beınekonferensbaılanys rejıminde ótkizý qarastyrylyp otyr», - dedi partıa hatshysy Murat Qojamqulov.

Sonymen birge, partıa tóraǵasynyń quzyreti, sondaı-aq onyń ókilettigin óz erkimen merziminen buryn toqtatý jaǵdaıynda partıanyń jańa tóraǵasyn saılaý tártibi tolyqtyryldy.

«Partıa tóraǵasy óz ókilettigin merziminen buryn toqtatý týraly ótinishti berý kezinde Saıası keńes partıanyń jańa tóraǵasynyń saılanýyn qamtamasyz etý mindeti júkteletin atqarýshy hatshyny saılaıdy», - dep tolyqtyrdy partıa hatshysy.

Eske salsaq, buǵan deıin «Birlik» partıasy sıez ótkizetini týraly habarlaǵan edik. Sonymen qatar, «Aýyl» partıasy «Birlik» partıasynyń qosylý týraly usynysynan bas tartty.