Qazaqstannyń úzdik aýyl ákimi anyqtaldy. Bul týraly memlekettik qyzmet isteri agenttiginiń baspasóz qyzmeti habarlady.

"Memlekettik qyzmet isteri agenttiginiń bastamasymen "Rýhanı jańǵyrý" baǵdarlamasy aıasynda "Úzdik aýyl ákimi" respýblıkalyq baıqaýy aıaqtaldy.

Úzdik aýyl ákimi bolyp Almaty oblysy İle aýdany Boraldaı kentiniń ákimi Danıar Qońyrbaev tanyldy. Ol daýys berý kezinde eń kóp upaı jınap, 1-júldeli orynǵa ıe boldy. Sondaı-aq óz aımaǵynyń áleýmettik-ekonomıkalyq jaǵdaıyn jaqsartý boıynsha jobasyn sátti qorǵap shyqty" delingen habarlamada.

2-oryndy 2 ákim ıelendi. Olar: Aqmola oblysy Selınograd aýdany Mánshúk aýyldyq okrýginiń ákimi Ǵanı Isaev jáne Aqtóbe oblysy Muǵaljar aýdany Taldysaı aýyldyq okrýginiń ákimi Qazbek Aqqaıyr.

3-oryndy da 2 ákim ıelendi: Pavlodar oblysy Aqtoǵaı aýdany Jalaýly aýyldyq okriginiń ákimi Azamat Medetov jáne SHQO Jarma aýdany Shalabaı aýyldyq okriginiń ákimi Janar Esembaeva.

Sondaı-aq "Úzdik áleýmettik-ekonomıkalyq joba" nomınasıasy Jambyl oblysy Rysqulov aýdany Abaı aýyldyq okriginiń ákimi Muratbek Arystambekovke, "Halyqqa ashyq ákim" nomınasıasy Qaraǵandy oblysy Buqar jyraý aýdany Sentralnyı aýyldyq okrýginiń ákimi Samat Meırmanovqa, "Úzdik isker-sharýa ákim"  nomınasıasy Atyraý oblysy Isataı aýdany Tushshyqudyq aýyldyq okrýginiń ákimi Mádı Óteǵalıevke tabystaldy.  

"Konkýrstyń maqsaty eldiń aýyldyq eldi mekenderindegi jergilikti ózin-ózi basqarýdy damytý, jergilikti bastamalardy, onyń ishinde qoǵamdyq ózin-ózi basqarý uıymdaryn yntalandyrý, jumysta joǵary nátıjelerge qol jetkizgen, aýyldyq eldi mekenderdi damytýǵa eleýli úles qosatyn úzdik aýyl ákimderin anyqtaý jáne kótermeleý" delingen memlekettik qyzmet isteri agenttiginiń baspasóz qyzmetiniń habarlamasynda.