Temirtaýda polısıa qyzmetkeri kóligimen er adamdy qaǵyp ketti, dep habarlady zakon.kz.

Qaraǵandy oblysy polısıa departamenti baspasóz qyzmetiniń málimetinshe, jol apaty 3 qazanda Temirtaý qalasynda bolǵan.

"Respýblıka dańǵyly boıymen Vostochnaıa kóshesine qaraı kele jatqan Lada Vesta qyzmet avtokóliginiń polıseı júrgizýshisi jaıaý júrginshiler ótkelinde 65 jastaǵy er adamdy qaǵyp ketti. Aýa raıy tumandy bolatyn. Jol apaty saldarynan zardap shekken adam Temirtaý aýrýhanasynda kóz jumdy" delingen habarlamada.

Oqıǵa ornyna jetken oblystyq polısıa departamenti basshylyǵy, Temirtaý prokýratýrasy ókilderiniń qatysýymen polısıa serjanty narkologıalyq dıspanserde tekserýden ótip, saý ekeni anyqtaldy.

Jol apaty boıynsha qylmystyq kodekstiń 345-baby ("Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy") boıynsha sotqa deıingi tergeý bastaldy. Qylmystyq is oblystyq polısıa departamentiniń anyqtaý basqarmasynyń is júrgizýinde jatyr.

Polısıa tergeýdiń naqtylyǵy men jan-jaqtylyǵyna kúmán joq ekenin atap ótti. İs atalǵan departamenttiń bastyǵynyń baqylaýynda júrgizilip jatyr.

"Ratel.kz aqparat agenttiginde jarıalanǵan aqparat durys emes. Jalǵan aqparat taratqany úshin qylmystyq jaýapkershilik qarastyrylǵanyn eskertemiz. Memlekettik organdardyń resmı aqparaty negizinde ǵana tujyrym jasaýǵa shaqyramyz" delingen departament habarlamasynda.