Zańger, qoǵam belsendisi Aıgúl Orynbek facebook paraqshasynda balasyn ákesinen kúshtep alyp ketýge árekettenip jatqan áıeldiń vıdeosyn jarıalady.
Zańger sot zań júzinde balany anasynda qaldyrý týraly sheshim shyǵarǵanymen balanyń tańdaýy eskerilip, quqyǵy taptalmaýǵa tıis dep sanaıdy.
Oqıǵa 2 qazan kúni Mańǵystaý oblysy Basqudyq aýylynda bolǵan. Vıdeodan balanyń anasyna barǵysy kelmeı, qashyp júrgenin kórýge bolady.
"Balalardy erkinen tys májbúrleý!
Balalar anasyna barǵysy kelip turǵan joq, al anasy sony bile tura, malsha súırelep alyp ketip jatyr.
Áıel men erkek ajyrasty, balalardyń ne kinási bar?
Balada tańdaý quqyǵy bolý kerek!
Polısıa qyzmetkeri, psıholog ne qarap tur myna jerde?
Sot sheshimi ana jaǵyna shyqsa da, balalardy erkinen tys májbúrleýge bolmaıdy" delingen jazbada.
Oblystyq polısıa departamenti kelinshekke balalar ózimen birge barýdy qalamasa, ákelerimen qalatyny eskertilgenin, sońynda úsh balanyń ákesinde qalǵanyn habarlady.
"Polısıa departamentine burynǵy kúıeýi sot sheshimine qaramastan balalardy bermedi dep azamatsha ótinish bildirip keldi. Kámeletke tolmaǵandar isi jónindegi ınspektor, sondaı-aq ýchaskelik ınspektordyń kómekshisi balalardyń turǵylyqty meken-jaıyna jolǵa shyqqan. Eger balalar anasymen birge ketýden bas tartsa, onda eshkim olardy májbúrlemeıdi jáne psıhıkasyna zaqym keltirmeıdi dep azamatshaǵa aldyn-ala eskertken. Azamatshaǵa qamqorshylyq bólimine júginýge keńes berildi, biraq ol bas tartty. Balalar ákesinde qaldy. Polısıa qyzmetkerleri balalardyń anasymen birge barǵysy kelmeıtinin kórip, osy azamatsha men onyń advokatynan sot prıstavtarymen kelýdi surady" delingen Mańǵystaý oblysynyń polısıa departamenti taratqan habarlamada.
