"Qamshy" redaksıasyna Almaty oblysy Aqsý aýdany Qyzylaǵash aýylynyń Kamash Nurdanbek esimdi turǵyny joǵalǵan jıyrma iri qarany izdeýge jergilikti polısıa qyzmetkerleri qulyq tanytpaı otyrǵanyn aıtyp habarlasty. Onyń sózinshe, polısıa qyzmetkerleri o basta "joǵalǵan mal tabyldy, qylmyskerler ustaldy" dep habarlap, artynsha sózderinen taıqyp, shatasqandaryn jetkizgen. "Jergilikti ishki ister bóliminen qaıyr bolmady" degen azamat ishki ister mınıstri, bas prokýror jáne Almaty oblysynyń ákiminen kómek suraıdy. Máseleniń tolyq mán-jaıy oqyrman hatynda baıan etilgen.

QR İshki ister mınıstri E.Z. Turǵymbaevqa;

QR Bas prokýrory Ǵ.D. Nurdáýletovke;

Almaty oblysynyń ákimi A.Ǵ. Batalovqa

ARYZ

Men Kamash Nurdanbek – Almaty oblysy Aqsý aýdany Qyzylaǵash aýylyndaǵy Dalǵabaev kóshesi №17-úıdiń turǵynymyn.

2019 jyldyń 22 shildesinde meniń qoramnan jıyrma bas iri qara urlandy. Meniń shaǵymym boıynsha atalǵan derek №191932031000401 qylmystyq is retinde Aqsý aýdandyq polısıa bólimine tirkelgen. Alaıda polısıa qyzmetkerleriniń jasaǵan jumystarynyń  nátıjesi ońdy bolmaı otyr. Olar aldymen "mal tabyldy, urylar ustaldy" dep alyp, kóp uzamaı sózderinen jaltaryp, "maldy tappadyq, shatasyppyz, tabylǵan mal basqa bireýdiki eken" dep otyr. Artynsha izdeý jumystary múlde toqtatylǵan.

Malymyzdy "tabyldy" dep alyp, artynsha sózderin qaıtyp alýy túrli bóten oılarǵa jeteleıdi. Elimizde mal urlyǵy boıynsha zań qatańdatylyp jatqanda, jergilikti polıseılerdiń bul áreketin túsine almadyq.

Mal urlyǵy úshin jazany kúsheıtýdi memleket basshysy Qasym-Jomart Kemeluly Toqaevtyń ózi 2019 jyldyń qazan aıynda tapsyrǵan bolatyn.

Al 27 jeltoqsanda Prezıdent qol qoıǵan birqatar zańmen birge "Mal urlyǵyna" qatysty bap ta bar. Máselen, qylmystyq kodekstiń 188-babyna tómendegideı ózgeris engen:

188-1-bap. Mal urlaý

1. Mal urlaý, ıaǵnı bótenniń malyn jasyryn jymqyrý – múlki tárkilenip, úsh myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna, ne bes jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady;
2. 2) iri mólsherde jasalǵan mal urlaý – múlki tárkilenip, úsh jyldan jeti jylǵa deıingi merzimge bas bostandyǵynan aıyrýǵa jazalanady.
3. 2) turǵyn úı-jaıdyń, kásiporynnyń, uıymnyń, mekemeniń, mal qoranyń, qashanyń nemese ózge de qoımanyń aýlasyna kirýmen jasalǵan mal urlaý –  múlkim tárkilenip, bes jyldan on jylǵa deıingi merzimge bas bostandyǵynan aıyrýǵa jazalanady.
4. 2) 2) asa iri mólsherde jasalǵan mal urlaý – múlki tárkilenip, jeti jyldan on eki jylǵa deıingi merzimge bas bostandyǵynan aıyrýǵa jazalanady.

Kórip otyrǵanymyzdaı zań qatańdatylǵan. Aýylda maly urlanyp, jer sıpap qalǵan jalǵyz men ǵana emes. Biz zańnyń kúsheıýine baılanysty qylmyskerler polısıa qyzmetkerleriniń "aýzyn maılap", isti jyly jabýǵa kúsh salyp otyr ma dep alańdaımyz. Árıne, biz polıseılerimiz adal qyzmet atqaratynyna sengimiz keledi. Desek te, quny 5-6 mıllıon shamasyndaǵy 20 bas iri qara tabylsa da, sybaılastyqpen joq bolyp ketý qaýpi bar.

Azyn aýlaq malymyzben jan baǵyp, kún kórip otyrǵan biz sıaqty qarapaıym sharýalarǵa osy zań ǵana medet berip otyr. Sizderden tıisti quzyrly mekemeler arqyly joǵarydan tekserister júrgizip, kómek kórsetýlerińizdi suraımyz!

Qurmetpen: Kamash Nurdanbek