Almaty oblysynyń ákimi Amandyq BatalovTaldyqorǵandaǵy 200 adamǵa arnalǵan ınfeksıalyq aýrýhanany ashty. Mekemeniń qurylysyna, sıfrlyq rentgen apparaty jáne tósek-oryn alýǵa barlyǵy 7,5 mlrd.teńge jumsalǵan. Aýmaǵy 4,18 gektardy alyp jatqan juqpaly aýrýlar aýrýhanasy 55 kúnde turǵyzyldy.

– Memleket basshysy Qasym-Jomart Toqaevtyń tapsyrmasyna oraı, koronavırýstyq ınfeksıanyń ekinshi tolqynyna daıyndalý maqsatynda respýblıkamyzdyń birneshe óńirinde modýldi juqpaly aýrýlar aýrýhanasyn salý qolǵa alyndy. Bizdiń oblys tapsyrma berilisimen jumysty bastap ketti. Búgin, mine, qysqa merzimde aýrýhanany paıdalanýǵa berip otyrmyz, – degen Amandyq Ǵabbasuly indet beleń alǵan kezde qaısarlyq kórsetken dárigerler qaýymyna alǵys bildirdi. Medısına mamandaryna aldaǵy ýaqytta barlyq jaǵdaıdyń jasalatynyn aıtty. Aýrýhana juqpaly indetti emdeýge jan-jaqty daıyn. Bir mezgilde 200 adamdy emdeýge arnalǵan aýrýhananyń 20 tósegi jan saqtaýǵa arnalǵan. MRT, sandyq rentgen apparaty, eki gemodıalız apparaty bar. Jan saqtaý bóliminiń tósekteri jasandy tynys aldyrý apparattarymen jabdyqtalǵan.

Aýrýhanaǵa maman tartý úshin kotejdi qalashyqtan 47 baspana beriledi. Sondaı-aq, dárigerlerge arnalǵan jataqhana salynýda. Onda úılenbegen jáne otbasyly mamandarǵa arnalǵan bólmeler bolady. Jataqhana qarasha aıynda paıdalanýǵa berilmekshi. Áleýmettik jaǵdaı jasaýdyń nátıjesinde atalmysh aýrýhanaǵa 10 dáriger kelmek. Odan basqa, reanımatolog, kardıolog, endokrınolog dárigerler jumysqa shaqyrylady.

Aýrýhanany ashqan Amandyq Ǵabbasuly nysandy qysqa merzimde sapaly salyp shyqqan «BI Group» qurylys kompanıasyna alǵys aıtty. «Qurylysshylarǵa rızashylyǵymdy bildiremin. Ózim de qurylysshy bolǵandyqtan jumystyń qandaı deńgeıde jasalyp jatqanyn qabyrǵasy qalanǵan kezde-aq baıqaǵanmyn. Mine, ishin aralap shyqtyq. Bári túp-túzý, talapqa saı. Qaýipsiz jáne jyly bolatynyna senim mol», – dedi ol.

Aýrýhanany muqıat qarap shyqqan oblys basshysy dárigerlerdiń jumysyna sáttilik tiledi. Mekemeniń syrty da jasyl jeleńmen kómkerilgen. Aımaq basshysy aýrýhananyń syrt kelbetin saqtap, aǵashtar men kógaldy ýaqytynda sýaryp, kútip-baptaýdy tapsyrdy.